Emri i Donald Trump-it ka nisur të krijojë në SHBA tensione që shkojnë gjer në përplasje. Pikërisht për shkak të një tensioni të jashtëzakonshëm në Universitetin e Ilinoisit në Çikago, tubimi elektoral i Donald Trump-it është anuluar.
Qindra protestues u mblodhën në vendin e tubimit disa orë përpara ardhjes së Trump-it. Në ambientet e brendshme të sallës ku ishte parashikuar të fliste kandidati republikan pati përplasje fizike mes grupimeve në mbështetje të Trump-it dhe atyre kundër tij.
Përplasjet nisën një orë përpara fillimit të tubimit elektoral dhe vijuan edhe pas anulimit. Flamuj të valëvitur, e thirrje të llojit “Ne e duam Trump-in” dhe “Ne e ndaluam Trump-in”, qenë gjatë gjithë kohës të pranishme. Nuk munguan dhe thirrjet në mbështetje të kandidatit demokrat Bernie Sanders.
Kaotike qe situata dhe jashtë sallës së tubimit, ndërsa policia u përpoq t’i vinte nën kontroll turmat e njerëzve.
Trump-i ka folur pas ngjarjeve për Fox News-in. “Përfaqësoj një grup të madh njerëzish që kanë shumë zemërim. Ka zemërim të jashtëzakonshëm në të dy palët.”
Në lidhje me anulimin e tubimit elektoral, kandidati polemizues republikan do të thoshte, “Mendoj se ishte një gjë shumë e mirë ajo që bëmë. Mendoj se ishte një veprim inteligjent.”
Provokimi i sentimenteve të pjesëve të mëdha të shoqërisë në fjalimet e Trump-it ka zënë të japë efektet e veta, siç e tregon edhe rrëmuja që i detyroi organizuesit e fushatës së tij ta anulojnë takimin elektoral. /tesheshi.com/
