I tërë procesi që ka vënë me shpatulla pas muri presidenten e Brazilit, Dilma Rousseff, është vënë në pikëpyetje me anulimin e autorizimit të nisjes së procedimit ligjor ndaj saj.
Vendimin e ka marrë kryetari zëvendësues i Dhomës së Ulët, Waldir Maranhao, që e mori detyrën vetëm para një jave, pas pezullimit të ish-kryetarit, Eduardo Cunha.
Maranhao ka anuluar votimin e 17 prillit në Dhomën e Ulët, që i jepte mundësi procedimit të vijonte në Senat, ku do duhej të miratohej rishtas.
Kryetari aktual i Dhomës së Ulët ka shpjeguar se ka patur parregullsi gjatë votimit. Ai ka deklaruar se anëtarët e Dhomës së Ulët nuk duhet ta kishin shprehur publikisht pozicionin e tyre para votimit. Sipas tij, kishte qenë i gabuar udhëzimi nga kryetarët e partive për anëtarët e tyre se si të votojnë.
Prej kryetarit të Dhomës së Ulët është kërkuar një votim i ri, por nuk është e qartë nëse Senati do të pranojë ta kthejë prapa procedimin. Po ashtu nuk dihet ende nëse ky vendim mund të hidhet poshtë.
Votimi në Senat është planifikuar për të mërkurën, por askush nuk di të thotë se çfarë rrjedhe do të marrin ngjarjet. /tesheshi.com/
