Gallatasaraj – Fenerbahçe, përballja më sfiduese e futbollit turk, e që do të luhej sonte në kuadër të javës së 26-të të Superligës turke, është anuluar për arsye sigurie.
Autoritetet përkatëse të ruajtjes së rendit kanë dhënë si arsye një “kërcënim serioz për sigurinë”.
Fillimisht u njoftua se takimi në “Türk Telekom Arena” do të luhej pa shikues, por Federata Turke e Futbollit ka lajmëruar dy orë më parë se ai do të shtyhej për një datë tjetër.
Derbi i Stambollit shoqërohet gjithmonë nga një prani e jashtëzakonshme e mbështetësve të të dy skuadrave dhe nga tensione në fushë e jashtë saj.
Rreth stadiumit ka ende prani të shtuar të forcave policore.
Vendimi për anulimin e ndeshjes vjen vetëm një ditë pasi një akt terrorist në një prej rrugëve më të populluara të metropolit turk u mori jetën pesë personave dhe la të plagosur 36 të tjerë.
Në një tjetër akt të tillë terrorist, më 13 mars, në Ankara, do të humbtte jetën dhe babai i sulmuesit të Gallatasarajit, Umut Bullutit. /tesheshi.com/
