Dy ekipet e famshme greke, që po kaq të famshëm për trazira i kanë dhe mbështetësit e tyre, do duhej të luanin mbrëmë për javën e njëmbëdhjetë të kampionatit të futbollit.
Nuk ka ndodhur kjo në stadiumin “Apostolos Nikolaidhis”, ndërsa tifozët e Panathinaikosit janë përleshur me policinë jashtë e brenda stadiumit. Gjendja u përkeqësua kur dalja në fushë e futbollistëve miq të Olimpiakosit u shoqërua me hedhjen drejt tyre të flakadanëve.
Gjyqtari i ndeshjes do të priste thuajse një orë përpara se ta anulonte atë. Vendimi i tij ka ndeshur në kundërshtinë e drejtuesve të klubit të Panathinaikosit, që e kanë quajtur atë të papërgjegjshëm dhe të gabuar.
Përplasja mes policisë dhe tifozëve nisi dy orë përpara ndeshjes, për t’u transferuar më pas brenda rrethimit të stadiumit.
Ende nuk dihet fati i ndeshjes, megjithëse besohet që Olimpiakosi do ta fitojë ndeshjen në tavolinë.
Skena të tilla dhune janë ngahera të pranishme në futbollin grek, posaçërisht në përballjet mes dy skuadrave të mësipërme. /tesheshi.com/
