Visar Zhiti mendohet të ketë qenë sebepi për të cilin, presidenti Nishani anulloi pritjen e ambasadorëve një ditë më parë. Edhe pse nga Presidenca shqiptare ende nuk ka asnjë qëndrim zyrtar lidhur me rastin në fjalë, i cili është i paprecedent, është aluduar se emri i Visar Zhitit, ambasador në Vatikan, i cili dy vjet të shkuara u kundërshtua nga Nishani për këtë post të propozuar nga qeveria, ka qenë pikërisht shkaku i anullimit të pritjes. Këtë e ka përforcuar së fundi dhe një deklaratë e ministrit të Jashtëm, Ditmir Bushati, tërë elozhe për Zhitin.
“Kam qenë jashtëzakonisht i emocionuar gjatë vizitës në Vatikan kur në çdo takim kam dëgjuar fjalët më të ngrohta dhe më të arrira për përfaqësimin tonë në Selinë e Shenjtë dhe për kontributin e Visarit jo thjesht si diplomat, por si një njeri të letrave”, ka thënë Bushati.
Rasti i Visar Zhitit u bë shkak për një përplasje Qeveri-Presidencë, ku shkrimtari e poeti i njohur, i rreshtuar politikisht tek e djathta, u propozua nga qeveria e majtë e Ramës për të qenë ambasador në Vatikan. Ndërkohë që nuk ndodhi e njëjta gjë me Leonard Demin, figurë e PD-së, ish-deputet i kësaj partie, i cili po ashtu u emërua nga Rama si ambasador në NATO. /tesheshi.com/
