Nga Bashkim Kastrati
Anulimi i tenderit për furnizim me citostatikë nga Organi Shqyrtues i Prokurimit mund të shkaktojë probleme të mëdha tek pacientët, pasi që këto medikamente përdorën për trajtimin e kacereve të ndryshme.
Dihet që tash e disa vite ka pasur ankesa të shpeshta nga Klinika e Onkologjisë në lidhje me furnizimin e pamjaftueshëm me citostatikë dhe kjo ka ndodhur për shkak të buxhetit jo të mjaftueshëm për të blerë medikamente të tilla, pasi që ato kanë kosto të lartë, ndërsa anulimi i këtij tenderi mund të shkaktojë pasoja të mëdha për pacientët e prekur me sëmundje malinje.
Sipas ekspertëve shëndetësor, terapia me citostatikë duhet që të merret me rregull dhe në kohën e caktuar nga mjeku onkolog dhe se çdo vonesë mund të shkaktojë komplikime tek pacientët dhe të humb i gjithë efekti i trajtimit që është bërë paraprakisht me citostatikë dhe sëmundja mund të bëjë progres.
Anulimi i tenderit për citostatikë ka ndodhur pasi që Paneli Shqyrtues i Prokurimit ia ka kthyer mbrapsht këtë tender Qendrës Klinike Universitare të Kosovës (QKUK) për shkak se operatori ekonomik nuk ka ofertuar konform kërkesave, konkretisht i njëjti nuk ka dëshmuar se posedon ndonjë referencë për kryerjen e punëve që e ka fituar tenderin.
“Ekspertët e OSHP-së në raportin e tyre kanë sqaruar se Autoriteti Kontraktues, në këtë rast QKUK, vlerësimin e ofertave e ka bërë në kundërshtim me nenin 59 të LPP-së, pasi që ka rekomanduar për dhënie të kontratës në lot 3, operatorin ekonomik i cili nuk ka ofertuar konformë kërkesave e parapara në dosjen e tenderit dhe të njoftimit për kontratë, konkretisht i njëjti nuk ka dëshmuar se posedon ndonjë referencë për kryerjen e punëve të ngjashme të parapara në pikën 9.1, pozicioni 1, të FDT-së”, thuhet në vendimin e OPSH-së.
Oferta e zgjedhur nga QKUK do të kursente 1.5 milionë euro
Në lidhje me anulimin e tenderit për citostatikë, zyra e prokurimit në QKUK ka shpjeguar diferencën në çmimet e ofruara nga operatori ekonomik që ka fituar tenderin, e cila ishte 1 milion e 554 mijë e 480euro më e ulët për artikujt e njëjtë, shumë kjo që do të kursente buxhetin e QKUK-së.
Sipas QKUK-së, si në njoftimin për kontratë, ashtu edhe në dosjen e tenderit ishin kërkuar Referenca për furnizime të ngjashme të institucioneve shëndetësore nga Operatorët Ekonomik .
“Pas kontrollimit të dy ofertave që kanë të bëjnë me Lotin 3, komisioni për vlerësim, bazuar në atë se artikulli i kërkuar në Lot 3 (Imatinib Mesylate) është i regjistruar në AKPM nga OE “Exclusiv” konsiderohet se në bazë të nenit 59.4 të Ligjit të Prokurimit Publik, se ky është devijim i vogël që nuk mund të shkaktojë ndryshim material ose devijim nga karakteristikat, kushtet dhe kërkesat e tjera të parashtruara në njoftimin për kontratë në dosjen e tenderit”, thuhet në reagimin e QKUK-së.
Në këtë kontekst QKUK rikujton se duhet pasur parasysh edhe neni 6 i Ligjit të Prokurimit Publik, ku të gjitha autoritetet kontraktuese janë të obliguara të sigurojnë që fondet publike dhe burimet publike të përdoren në mënyrën më ekonomike, njëkohësisht duke marrë në konsideratë qëllimin dhe lëndën e prokurimit.
MSh-së i vije keq për anulimin e tenderit dhe për shqetësimet e pacientëve
Faik Hoti drejtor i departamentit për informim në Ministrinë e Shëndetësisë ka thënë për tesheshi.com se anulimi i tenderit për citostatikë mund të shkaktojë probleme në furnizim me këto barna dhe vonesa për disa pacientë, por sipas tij kjo ministri do të koordinohet me të gjithë partnerët e saj për të tejkaluar këtë situatë. Ai thotë se aktualisht përkundër anulimit të një tenderi të citostatikëve, furnizimi me citostatikë sillet rreth 80 %.
“Megjithatë, për ato barna për të cilat duhet të përsëritet tenderi, MSH dhe SHSKUK, bashkë edhe me donatorët, do të gjejnë zgjidhjet më të përshtatshme të mundshme brenda mundësive që ekzistojnë. MSh-së i vije keq që tenderi i QKUK-së është anuluar, ndonëse, sipas shpjegimeve të kësaj qendre, ai tender përveç se do të siguronte një furnizim për disa lloje citostatikësh, ndër të tjera, do t’i kursente QKUK-së edhe 1.5 milionë euro. Mbi të gjitha MSH-së i vije keq për shqetësimet shëndetësore që si pasojë u janë shkaktuar pacientëve në nevojë. Përndryshe, vetëm disa ditë më para se të anulohet tenderi, Fondacioni Amerikan “Project Hope” ka ndihmuar QKUK-në me një donacion të citostatikëve në vlerë monetare prej 529.511 euro”, thotë Hoti. /tesheshi.com/
