Nga Ylli Pata
Një vajzë e hollë shpërndan numrat çdo ditë tek Qendra Kombëtare e Regjistrimit të Bizneseve.
Sipas rendit të paraqitjes së njerëzve, jepet një letër me disa shifra. Beluli, një 50-vjeçar ka një biznes pasurish të patundshme. Sipas radhës i ra numri 140.
“Bobo”, shfryn, “dje më ra 110-ta e humba sërish. E pyes se çdo me thënë kjo dhe më shpjegon me hollësi. “Çdo ditë në QKR shpërndahen numrat sipas radhës të bizneseve që paraqiten për t`u regjistruar.
Por radha të gjitha ditët nuk i kalon më shumë se numri 79 ose 84. Dhe çndodh?! Çdo ditë gjithçka nis nga e para pasi përfundon numërimi në orën 16.00 të çdo dite.
Këtu Beluli rrit tonin: “Ashtu më ndodhi edhe sot, më dhanë numrin 140 dhe deri në ora 14.00 shkuam te 70-ta. U pa puna, do ta blej 20 mijë lekë radhën. E shef atë xhaxhon që rri ulur tek ajo karrikja portative? Vjen çdo ditë dhe prenoton mbi 10 vende dhe më pas i shpërndan kundrejt një pagese 10 apo 20 mijë lekësh si të jetë rasti.
Shumë biznesmenë s’kanë kohë dhe e blejnë radhën. Kështu më bie edhe mua. Por më mirë ta lënë të lirë dhe të mos vendosin numra, se ata nuk funksionojnë. Vetëm sa krijohet një treg i zi që krijon pastaj zhurmë dhe korrupsion”.
Xhaxhai i ulur në karriken portative thotë se e quajnë Irakli Poshti. Është i moshës 65 vjeç dhe thotë se ka një nyje betoni pranë lumit Erzen.
Kur e pyes pse vjen përditë, të përgjigjet se e bën ngaqë është i ngeshëm dhe mban radhë për miqtë e tij prodhues inertesh.
Gazmir Risto, një djalë rreth të 30-tave që thotë se ka një dyqan bylmeti, ia beh duke thënë se ka 4 ditë që e sheh xha Irakliun në radhë.
I moshuari nuk ia përton: “Pse ty o të marr leje unë!”. Në çast vajza hollake e QKR-së thotë lajmin e mirë që sot mund të shkojnë deri të 100-ta meqë është e premte.
Rritet optimizmi dhe biznesmenët që kanë humbur atë pompozitetin e përditshëm mbajnë qëndrim gatitu.
Nuk kalon shumë kohë, fiks as 10 minuta kur një djalë futet nga dera e klientëve dhe thotë: “Ka ardh kontroll nga drejtoria, na falni. Fillojmë të hënën”.
Aty menjëherë plas rrëmuja. Nuk pyetet më për etikë, nxjerrin telefonat dhe të gjithë çojnë sms: dikush te kryeministri Rama, e ca të tjerë tek deputetët e zonës.
Një grua nga Saranda thotë që do të shkojë tek Dhoma e Tregtisëm pasi nuk është normale të vish nga larg e të mos zgjidhësh punë.
Një burrë rreth të 40-ave thotë se mori Gramoz Ruçin në telefon dhe ky i fundit i paskësh thënë se më mirë të flasësh me Koço Kokëdhimën… Bëhet një rrëmujë, kur ja, vjen me vrap Arben Ahmetaj, ministri dora vetë dhe me ton urdhërues u thotë atyre të sportelit: “Do ta mbani hapur deri në darkë madje edhe të shtunë e të dielë!”
Behluli pyet: Po radha a do të respektohet? Ministrit i bie telefoni dhe largohet…
/tesheshi.com/
