Një supermarket gjerman ka zbrazur raftet e saj, në një përpjekje senzibilizimi për diversitetin dhe kundër racizmit.
Edeka në Hamburg hoqi prodhimet e huaja nga stoku i tij, duke i zëvendësuar ato me shenja që mbanin sllogane anti-ksenofobie. Besohet se kjo masë do të pasohet nga një fushatë më e madhe nga Edeka, zinxhiri më i madh i supermarketeve në Gjermani.
Blerësit hynë në dyqan të habitur, për të parë se pjesa më e madhe e mallrave të përditshme ishin zhdukur, duke treguar në këtë mënyrë se sa të varur janë ata nga vendet e tjera për produktet e përditshme. Në vend të kësaj, ata hasën në taleba në të cilat shkruhej: “Ky raft është shumë i mërzitshëm pa diversitet”.
Në tabela të tjera shkruhej po ashtu se: “Asortimenet tona tani nuk njohin kufij”, “Kaq boshe duken raftet pa të huaj” dhe “Do të jemi më të varfër pa diversitet”.
Fushata u prit me reagime të përziera nga publiku gjerman, ndërsa disa vlerësuan guximin e saj.
Sven Schmidt, i cili ia dërgoi fotot e dyqanit gazetës The Independent, tha se i pëlqeu fushata, megjithëse pati disa reagime negative pas publikimit të fotove në Twitter, të cilat ishin të shpërndara gjerësisht.
Julia Klöckner, nënkryetarja e partisë së Bashkimit Kristian Demokratik, e vlerësoi fushatën në mediat sociale, duke e quajtur atë një “veprim të mençur” dhe një shkas i mirë që njerëzit të mendojnë për këtë.
Por të tjerët e përqeshën atë si një fushatë marketingu, duke përfituar nga atmosfera e ngarkuar politikisht përpara zgjedhjeve federale të vendit muajin tjetër.
Disa e kundërshtuan këtë veprim politikisht. Marcus Pretzell, nga partia anti-emigracion Alternativa për Gjermaninë (AfD), iu përgjigj fjalëve të znj. Klöckner duke thënë: “Pse duhet të jetë veprim i mençur? A nuk është tërësisht (veprim) i çmendur? ”
Të tjerë thanë se supermarketi nuk është vend i duhur për t’u përfshirë në diskutimet politike.
Biseda të tilla janë bërë më të shpeshta në Gjermani gjatë javëve të fundit, ndërkohë që vendi po përgatitet të shkojë në votime.
Emigracioni ka qenë një temë kryesore në politikën gjermane që nga vendimi i Kancelarit Angela Merkel për vitin 2015, për të lejuar më shumë se një milion emigrantë në vend, shumë prej tyre refugjatë nga Siria e shkatërruar nga lufta.
Një zëdhënëse e kompanisë tha: “Edeka mbështet shumëllojshmërinë dhe diversitetin. Në dyqanet tona ne shesim ushqime të shumta që prodhohen në rajone të ndryshme të Gjermanisë. Por vetëm së bashku me produktet e vendeve të tjera është e mundur të krijojmë larmi unike, të cilën konsumatorët tanë e vlerësojnë. Jemi të kënaqur që fushata jonë ka shkaktuar kaq shumë reagime pozitive “. /tesheshi.com/
