Një raport që i është paraqitur Presidentit Emmanuel Macron këtë të mërkurë pretendon se Vëllazëria Muslimane përbën një “kërcënim për kohezionin kombëtar” në Francë dhe bën thirrje për veprime konkrete për të frenuar përhapjen e “Islamit politik”.
“Realiteti i këtij kërcënimi, edhe pse afatgjatë dhe pa përfshirje të veprimeve të dhunshme, paraqet rrezik dëmtimi të indit shoqëror dhe institucioneve republikane… dhe, në përgjithësi, të kohezionit kombëtar,” thuhet në raport, një kopje e të cilit u sigurua nga AFP të martën. Raporti, i përgatitur nga dy zyrtarë të lartë civilë, do të shqyrtohet nga Këshilli i Mbrojtjes të mërkurën. Franca dhe Gjermania kanë popullatat më të mëdha muslimane mes vendeve të Bashkimit Evropian.
Raporti thekson përhapjen e lëvizjes “nga poshtë lart” dhe në nivelin bashkiak, duke shtuar se ky fenomen përbën “një kërcënim afatshkurtër dhe afatmesëm”. Përballë kësaj, “një veprim i vendosur dhe afatgjatë në terren duket i domosdoshëm” për të frenuar atë që autorët e quajtën “ngritjen e Islamizmit politik”.
Raporti vë në pah “natyrën subversive të projektit”, duke theksuar se ai synon “të sjellë gradualisht ndryshime në rregullat lokale ose kombëtare”, veçanërisht ato që lidhen me laicitetin dhe barazinë gjinore. Ministri i Brendshëm francez, Bruno Retailleau, i njohur për qëndrimet e tij të forta, shprehu të martën shqetësimin për “një islamizëm të nivelit të ulët” synimi “përfundimtar i të cilit është kthimi i gjithë shoqërisë franceze drejt ligjit të Sheriatit”.
Megjithatë, autorët e raportit theksojnë se “asnjë dokument i kohëve të fundit nuk demonstron dëshirën e muslimanëve në Francë për të krijuar një shtet islamik në Francë apo për të zbatuar ligjin e Sheriatit atje.” Organizata “Musulmans de France” (muslimanët e Francës), dikur “Unioni i Organizatave Islamike të Francës“, identifikohet si “dega kombëtare e Vëllazërisë muslimane në Francë”.
“Ne nuk po merremi me separatizëm agresiv,” por me një “qëllim të hollë (…) por jo më pak subversive për institucionet,” shkruajnë autorët. Raporti vlerëson se ekzistojnë 139 vende adhurimi të lidhura me “muslimanët e Francës“, me 68 të tjera që konsiderohen afër kësaj federate. Kjo përfaqëson 7% të 2,800 vendeve të adhurimit musliman të listuara në Francë, thuhet në raport. Vëllazëria po humbet ndikimin në botën arabe dhe po “fokuson përpjekjet e saj në Evropë”, shtohet më tej.
Raporti sugjeron se një fushatë ndërgjegjësimi publik duhet të kombinohet me përpjekje të reja për të promovuar një “diskurs laik“, si dhe “sinjale të forta dhe pozitive ndaj komunitetit musliman“, duke përfshirë edhe mësimin e gjuhës arabe.
Duhet theksuar se raporte të tilla, pavarësisht gjuhës “profesionale”, janë shpesh forma të kamufluara të Islamofobisë institucionale. Ato justifikojnë politika shtetërore që synojnë kufizimin e çdo forme të aktivizmit islam në Francë. Nën petkun e “luftës kundër islamizmit politik” apo “separatizmit“, shpesh synohet dhe kriminalizohet liria e shprehjes dhe organizimit të komuniteteve muslimane.
Kjo dinamikë është dokumentuar gjerësisht nga studime si Raporti Evropian i Islamofobisë (EIR), i cili që nga viti 2015 ka evidentuar se si narrativa e politika të tilla kontribuojnë në rritjen e diskriminimit dhe stigmatizimit të muslimanëve. Raporti i EIR për Francën ka theksuar se shpeshherë qeveria minimizon incidentet islamofobe duke i kufizuar ato vetëm në sulme direkte, ndërkohë që politikat publike, si ato nën petkun e “laicitetit”, kufizojnë dukshmërinë dhe aksesin e muslimanëve në hapësirat publike, sidomos për gratë muslimane.
Këto raporte, në thelb, shërbejnë si mjete për të legjitimuar ndërhyrjen dhe kontrollin mbi jetën civile të muslimanëve, duke minuar integrimin e tyre të vërtetë dhe duke nxitur ndarje shoqërore.
Përbën paradoks gjithashtu fakti se kjo frikë franceze nga Islami kinse politik shfaqet në një vend që mban autorësinë e masakrimit të mijëra muslimanëve në në Algjeri, Tunizi e Marok, në kohën e kolonializimit të këtyre vendeve. /tesheshi.com/
