Hillary Clinton dhe Donald Trump janë kandidatët respektivë të demokratëve dhe republikanëve në garën presidenciale në SHBA, dhe çdo qëndrim a thënie e tyre ka nisur të mbikëqyret imtësisht, për t’u reflektuar në anketimet mbi ecurinë e rivalitetit të tyre.
Një anketim i fundit, McClatchy-Marist poll, tregon se Hillary Clinton kryeson me 15 pikë karshi rivalit të saj. Mbështetja për ish-sekretaren amerikane të Shtetit është në 48 për qind të votuesve të mundshëm, përkundër 33 përqindëve të Trump-it.
Organizuesit e anketimit ia faturojnë shifrat e anketimit gafave të Trump-it pas mbylljes së njëpasnjëshme të konventave të republikanë dhe demokratëve në ditët e shkuara. Muajin e shkuar Clinton udhëhiqte ndaj Trump-it në një raport 42 me 39 për qind.
Anketimi i fundit flet për një kryesim të Clinton-it mes femrave, me 51 për qind karshi 35 përqindëve të Trump-it. Te afro-amerikanët, raporti mes Clinton-it dhe Trump-it është i jashtëzakonshëm, 91 me 1 për qind, e po ashtu te votuesit jo të bardhë, 69 me 17 për qind.
Votuesit e bardhë janë më të prirur nga Trump, duke i dhënë një përkrahje prej 45 përqindësh krahasuar me 40 për qind për Clinton-in. Trump ka gjithashtu mbështetjen e të moshuarve dhe të pavarurve.
Një anketim tjetër, i kryer nga The Wall Street Journal dhe NBC News-i, e nxjerr Clinton-in me një kryesim prej nëntë përqindësh karshi Trump-it. /tesheshi.com/
