Shumica e të rinjve serbë nuk e përkrahin hapjen e urës mbi lumin Ibër në Mitrovicë për qarkullim të automjeteve, ndërsa e kundërta ndodh me të rinjtë shqiptarë të asaj pjese.
Sipas një ankete të realizuar nga Qendra për Zgjidhje Alternative të Kontesteve në veri të Mitrovicës, 88 për qind e të rinjve serbë janë shprehur kundër hapjes së urës, ndërsa vetëm 12 për qind mendojnë se ura duhet të hapet për qarkullim të automjeteve dhe të këmbësorëve.
Në anën tjetër, 65 për qind e të rinjve shqiptarë mendojnë se ura duhet të hapet për qarkullim të automjeteve dhe të këmbësorëve.
Disa nga pjesëmarrësit në tryezën “Radio Kontakt Plus” dhe Qendra për Zgjidhje Alternative të Kontesteve – Qendra për Ndërmjetësim në Mitrovicë, në kuadër të projektit “Përtej urës, simbolika, liria e lëvizjes dhe siguria”, e organizuar në veri të Mitrovicës, e kanë arsyetuar qëndrimin e të rinjve serbë me problemet e shumta të sigurisë, të cilat, siç kanë thënë ata, “kanë ndodhur me qindra raste (incidente) që kanë rrezikuar jetën e serbëve dhe pasurinë e tyre”.
“Njerëzit janë të frikësuar sepse deri më tani ka pasur me qindra, nëse jo edhe me mijëra raste kur jeta e tyre dhe pasuria u është rrezikuar”, ka deklaruar Llazar Rakiç, përfaqësuesi i Qendrës për Zgjidhje Alternative të Kontesteve.
Ndërkaq, Milivoje Rajçeviç është shprehur se nuk ka fare nevojë që të përmendet ura kryesore e Ibrit.
“Askush nuk po flet për sigurinë në urë, askush nuk flet për atë se çfarë do të sjellë hapja e urës. Rrënjët e problemeve ekzistojnë, ndarja e Mitrovicës është e qartë”, ka thënë ai. /tesheshi.com/
