Sipas një sondazhi të ri, Britania e Madhe po bëhet një shoqëri gjithnjë e më ateiste. Rezultatet tregojnë se 53% e britanikëve deklarohen se nuk i takojnë asnjë përkatësie fetare.
Kjo është përqindja më e lartë e matur ndonjëherë, dhe përfaqëson një rritje të konsiderueshme nga 48 përqind në vitin 2015, dhe 31 % në vitin 1983, kur Qendra Kombëtare për Kërkime Sociale bëri studimin e parë.
Trendi është i dukshëm në të gjitha grupmoshat, por është më i theksuar tek të rinjtë.
71 për qind e të anketuarve të moshës 18-24 vjeç në një sondazh të vitit 2016 kanë deklaruar se nuk janë fetarë, krahasuar me 62 të një viti më parë.
Një numër i konsiderueshëm i britanikëve më të vjetër deklarohen ende si besimtarë, ku 4 në 10 vetë të moshës 65-74 vjeç deklarojnë se nuk i takojnë asnjë religjioni, ndërkaq tek personat mbi 75 vjeç, kjo shifër është vetëm 27 %.
“Rënia më evidente është ajo në mesin e pjesëtarëve të Kishës Anglize, edhe pse këto shifra duhet të shërbejnë si shkas për reflektim edhe tek udhëheqësit e tjerë”, tha Rodger Harding, kreu i qendrës kërkimore.
Ai vlerësoi se një tendencë e tillë, veçanërisht në mesin e të rinjve, do të jetë vështirë të ndryshohet.
Vetëm 15 % e britanikëve sot deklarohen si pjesëtarë të Kishës, që është 50 % më pak se në vitin 2000. Përqindja e katolikëve në shoqërinë britanike është relativisht e qëndrueshme dhe sillet rreth dhjetë për qind.
6% përqind e britanikëve deklaruan se pasojnë një besim jo të krishterë, nga 8% në vitin e kaluar, dhe nga 2% në vitin 1983. Sondazhi nuk hyri në më shumë detaje.
Në sondazhin e vitit të kaluar janë përfshirë 2,942 njerëz, të cilët ishin pyetur: “A mendoni se i përkisni ndonjë besimi? Nëse po, cilit prej tyre?” /tesheshi.com/
