Shqiptarët kanë ulur shpenzimet për ushqim dhe kanë shtuar ato për arsimin dhe shëndetin. Të dhënat e një ankete të publikuara nga INSTAT japin një trend pak më ndryshe sesi familjet shqiptare llogarisin buxhetin mujor. Sipas anketës, krahasuar me pesë vjet më parë, janë ulur shpenzimet për ushqim dhe janë rritur ato që kanë të bëjnë me arsimimin dhe përkujdesjen shëndetësore të anëtarëve të familjes.
“Sipas anketës për vitin 2014, shpenzimet mesatare janë llogaritur rreth 69 mijë lekë të reja, për një familje me 3.8 pjesëtarë. 31 mijë lekë shkojnë për konsum ushqimor, ndërsa 38 mijë lekë shkojnë për konsum joushqimor”, shpjegon Anisa Omuri, specialiste e buxheteve të familjeve në INSTAT.
Gjithsesi, pjesa më e madhe e të ardhurave të familjes shkojnë për ushqimin, por kjo pjesë “luani” po grryhet nga nevoja në rritje që kanë të bëjnë me arsimin dhe shëndetin.
Rritja e shpenzimeve për arsim duket të jetë, sipas zyrtarëve të INSTAT, një zgjedhje e paramenduar për shkak se vetë anketa tregon se personat me më shumë arsim, kanë edhe të ardhurat më të larta.
Anketa sjell të dhëna interesante edhe për rritjen e pabarazisë në Shqipëri mes qarqeve të ndryshme sa i takon mirëqënies dhe nivelit të të ardhurave.
Sipas anketës, Tirana ka nivelin më të lartë të mirëqënies, ku një familje me 3.8 veta shpenzon mesatarisht mbi 81 mijë e 650 lekë në muaj, ndërsa në vendin e fundit është Elbasani, me rreth 53 mijë lekë ose 35% më pak. /tesheshi.com/
