Një qarkore e zv.ministrit të Brendshëm e datës 10 gusht 1942 që i drejtohej gjithë prefekturave të vendit, zbulon se sa të vështirë e gjeti terrenin Partia Fashiste në Shqipëri, ku edhe në rangjet e larta të qeverisjes në gjithë prefekturat, nuk kishte gjetur mbështetje për të përkrahur programin dhe ideologjinë e saj.
Duke mos gjetur mbështetje për të zhvilluar strukturat e saj, Sekretari i Partisë Fashiste Shqiptare, që në atë kohë ishte Jup Kazazi, kishte bërë një notë proteste për klimën aspak miqësore që kishin hasur në strukturat qeverisësë.
Pas kësaj ankese, nga Ministria e Brendshme kishte dalë një qarkore ku urdhëroheshin të gjithë strukturat qeverisëse në gjithë prefekturat e vendit që ta përkrahnin me çdo kusht Partinë Fashiste Shqiptare.
Qarkorja e plotë kishte tekstin e mëposhtëm:
Qarkore
Prefekturavet
Shkëlqesa, Ministri Sekretar i partisë Fashiste Shqiptare ankohet se shumë nga organet qeveritare të krahinave nuk janë tue i përkrahun organet e partisë në veprën e zhvillueme prej tyne për të mirën e popullit. Megjithëqë nji mungesë bashkëpunimi ksodore duket e pagjashme në vetvete, duhet me besue se organet krahinore te partisë slanë asnji arsye me u ankue pa pasun ndonji shkak të vërtetë.
Prandaj ju urdhnojmë qi përkrahja juej të jetë sa ma e plotë e sa ma e përzemërt në gjithça synon të mirën e popullit tonë në fushën shoqnore, ekonomike, morale e politike si dhe forcimin e besimit të popullit ndaj …fashist nga ana e organeve të Partisë.
N/Ministri
(Firma)
Partia Fashiste Shqiptare u themelua me 2 qershor 1939 dhe kryesohej nga Sekretari i caktuar (dhe që mund të shkarkohej) nga Gjenerali Shtatmadhorisë së Perandorit në Shqipëri, me propozim të Kryeministrit të Shqipërisë, pas këshillimit me Sekretarin e Partisë Fashiste Italiane.
Sekretari i Partisë Fashiste Shqiptare kishte titullin dhe funksionet e Ministrit Sekretar i Shtetit, ishte pjesë e qeverisë shqiptare, dhe merrte direktivat dhe urdhrat Duçes nga Sekretari i Partisë Fashiste Italiane.
Një fakt për t’u veçuar ishte se gjatë qëndrimit të saj në pushtet, Partia Fashiste Shqiptare u përpoq të zbatojë idenë e Shqipërisë së Madhe, duke zgjeruar kufijtë e shtetit shqiptar në Çamëri dhe në Kosovë. /tesheshi.com/
