Ankaraja, “pa tolerancë” ndaj dyshes nordike

Samiti i NATO-s në Madrid në fund të qershorit nuk është afati përfundimtar për të vendosur mbi kandidaturat e Suedisë dhe Finlandës për anëtarësim, gjë që Turqia e kundërshton, tha të shtunën Ibrahim Kalin, zëdhënës i presidentit turk Rexhep Tajip Erdogan.

Duke folur për agjencinë shtetërore turke Anatolia gjatë një vizite në Madrid, zëdhënësi dhe këshilltari kryesor i politikës së jashtme të Erdoganit përsëriti se përparimi në kandidaturën për anëtarësim varet nga mënyra se si Suedia dhe Finlanda u përgjigjen kërkesave turke, raportoi Reuters.

“Ne nuk e konsiderojmë samitin e NATO-s si një afat kohor”, tha Kalin.

Ai shtoi se ndërsa samiti është i rëndësishëm për zgjidhjen e çështjeve të përbashkëta si sulmi i Rusisë ndaj Ukrainës dhe bashkëpunimi brenda aleancës, aleatët e mundshëm duhet të ndërmarrin hapa për të zbutur shqetësimet e anëtarëve aktualë.

 “Ne nuk ndihemi sikur jemi nën ndonjë presion kohor për ta bërë këtë deri në samitin e NATO-s. Është e rëndësishme këtu që Suedia dhe Finlanda të deklarojnë hapur, qartë dhe konkretisht se çfarë hapash do të ndërmarrin në luftën kundër terrorizmit”, theksoi Kalin.

Suedia dhe Finlanda aplikuan për t’u bashkuar me NATO-n muajin e kaluar në përgjigje të sulmit të Rusisë ndaj Ukrainës, por kandidaturat e tyre hasën në rezistencën e Turqisë, e cila i akuzoi ata për mbështetjen e “ekstremistëve kurdë”.

Ndërsa dy vendet nordike thanë se rifillimi i bisedimeve do të zgjidhte mosmarrëveshjen, Erdogan tha të mërkurën se Ankaraja nuk kishte marrë asnjë përgjigje ndaj kërkesave të saj, duke përfshirë ndalimin e mbështetjes për grupet që i konsideron terroriste, heqjen e embargos së armëve ndaj Ankarasë dhe ekstradimin e të dyshuarve.

Në mënyrë që çdo vend i ri të anëtarësohet në NATO, vendimi duhet të mbështetet nga të 30 vendet anëtare. /tesheshi.com/