Kryeministri turk ka deklaruar sot se nuk mund të ketë kompromis me SHBA-të në lidhje me kërkesën për ekstradimin e Fethullah Gylenit, i cili akuzohet për orkestrimin e përpjekjes për grusht shteti të gati një muaji më parë.
“Shtetet e Bashkuara nuk mund ta shpërfillin kërkesën tonë,” i ka thënë Binali Jëlldërëm një grupi gazetarësh. “Eshtë e qartë si kristali se FETÖ është pas puçit të dështuar.”
“Elementi kryesor që i përmirëson marrëdhëniet tona me SHBA-të është ekstradimi i Gylenit, ku nuk ka hapësirë për negociata,” ka shtuar ai.
Drejtuesi i qeverisë turke do të vinte në pah një përmirësim të qëndrimit të SHBA-ve, por pa dhënë hollësi të mëtejshme. Mes të tjerash, Jëlldërëm ka lajmëruar ardhjen e zëvendëspresidentit amerikan, Joe Biden, në Turqi më 24 gusht.
Sa për largimet e të lidhurve me lëvizjen Gylen e me puçin e dështuar nga detyrat shtetërore, kryeministri turk ka bërë të ditur se janë pezulluar deri tani 76.597 nëpunës, dhe 4.897 persona, duke përfshirë më shumë se 3.000 ushtarakë, janë larguar nga postet e tyre.
“Ka vështirësi në përcaktimin e atyre që nuk janë të përfshirë drejtpërdrejt me organizatën, por ne po bëjmë ç’është e mundur që t’i shmangim gabimet,” ka kujtuar Binali Jëlldërëm.
Vend ka patur në fjalën e tij dhe për krizën siriane, duke u shprehur kështu, “Mos u habisni nëse zhvillime shumë të rëndësishme në lidhje me Sirinë ngjasin në gjashtë muajt e ardhshëm.” /tesheshi.com/
