Vendimi i administratës amerikane për të furnizuar me armatim SDF-në, Forcat Demokratike Siriane, të mbizotëruara nga YPG-ja, Njësitë e Mbrojtjes Popullore, të konsideruara si dega siriane e PKK-së, organizatës terroriste kurde, nga Ankaraja zyrtare, ka ngjallur zemërimin e kësaj të fundit.
Ka qenë kryeministri turk, Binali Yıldırım, ai që ka reaguar dje ndaj këtij vendimi, duke e shprehur hapur mospëlqimin e tij për vazhdimin e një politike të nisur nga administrata e Barack Obama-s, paraardhësit të Donald Trump-it në Shtëpinë e Bardhë.
“Nuk është e mundur që ne të pranojmë ndihmën e drejtpërdrejtë apo të tërthortë për PKK-në. SHBA-ja duhet të marrë një vendim. Ka ende një mundësi për Shtetet e Bashkuara që t’i marrë në konsideratë ndjeshmëritë e Turqisë. Ndryshe, pasojat nuk do të prekin vetëm Turqinë, një rrjedhojë negative do të ketë gjithashtu për Shtetet e Bashkuara,” ka deklaruar Yıldırım.
Vendimi amerikan për armatosjen e degës së PKK-së në Siri për ofensivën kundër DAESH-it në Rakka është përshkruar kështu nga kryeministri turk: “Nuk mund të mposhtet një organizatë terroriste me një tjetër grup terrorist.”
Turqia i sheh si degët siriane të PKK-së si Partinë e Unionit Demokratik, PYD-në, ashtu dhe krahun e saj të armatosur, YPG-në. Mbështetjen amerikane për to, presidenti turk Erdoğan e ka cilësuar si një mbetje të administratës së Barack Obama-s.
Fërkimet mes Ankarasë dhe Uashingtonit veçanërisht në vitin e fundit të presidencës së Obama-s kanë qenë pikërisht për shkak të mbështetjes së dhënë nga SHBA-ja për këto organizata në Siri.
“Çka po ngjet në Siri e shoh si mbetje të periudhës së Obama-s, me komandantët amerikanë në rajon që këmbëngulin në ndjekjen e të njëjtave politika. Nëse vazhdon kështu, është e pamundur të jemi në pajtim me SHBA-në,” deklaronte Erdoğan-i ditë më parë.
Ai do të jetë për vizitë në Uashington më 16-17 maj, ku do të diskutojë hollësisht mbi këtë çështje në takimin kokë më kokë me presidentin Trump. /tesheshi.com/
