“Në orët e fundit kemi marrë garancinë se të gjitha palët e përfshira do të ndalojnë së qëlluari njëra-tjetrën dhe do të përqendrohen te kërcënimi i ISIS-it,” do të thoshte të martën koloneli John Thomas, zëdhënësi i Komandës Qendrore të SHBA-ve.
Nga këtej, një numër mediash botërore do të njoftonin për një armëpushim midis forcave ushtarake turke, që po kryejnë operacionin “Mburoja e Eufratit” në Siri, dhe militantëve kurdë të PYD-së, të konsideruar degë e PKK-së e terroristë prej Turqisë.
Ministri turk për BE-në, Omer Çelik, ka reaguar sot, duke i hedhur poshtë raportimet për një marrëveshje armëpushimi mes Turqisë dhe PYD/PKK-së.
“Republika e Turqisë është një shtet i pavarur, ligjor. Ato [Turqia dhe PYD/PKK-ja] nuk mund të çmohen si të barabartë, e se ka patur një marrëveshje mes tyre. Aktivitetet e PYD-së në veri të Sirisë u vijnë në ndihmë grupeve ekstremiste, jo popullit kurd.”
Ndërkohë, ambasadori amerikan në Ankara, John Bass, është thirrur nga autoritetet përkatëse turke për t’i shprehur shqetësimin për deklaratat e Uashingtonit që bëjnë fjalë për një marrëveshje midis Turqisë dhe PYD-së, Partisë së Unionit Demokratik.
“Eshtë nënvizuar se deklarata të tilla nuk janë kurrsesi të pranueshme, e se ato nuk përputhen me marrëdhënien e aleancës,” thotë një njoftim i orëve të vona të ditës së djeshme i zëdhënësit të Ministrisë së Jashtme turke, Tanju Bilgiç.
Bilgiç e ka bërë të qartë se Turqia do ta vazhdojë operacionin gjersa të gjitha grupet terroriste të largohen prej kufirit turk e të mos përbëjnë më kërcënim për qytetarët turq.
Ai ka risjellë në vëmendje pritshmërinë e vendit të tij që SHBA-të të mbajnë fjalën e ta detyrojnë PYD-në të tërhiqet në lindje të Eufratit. /tesheshi.com/
