Turqia dënoi komentet e shefit të Ligës Arabe, Nabil Elaraby i cili kritikoi operacionet më të fundit turke mbi bazat e militantëve kurdë në veri të Irakut.
“Hedhim poshtë deklaratën e shefit të Ligës Arabe. Një qëndrim i tillë kundër betejës së vendosur të Turqisë mbi terrorin, bazuar në ligjin ndërkombëtar është i pakuptueshëm nisur edhe nga fakti që qeveria e Irakut e ka deklaruar hapur se nuk është në gjendje të parandalojë sulmet terroriste të PKK-së në Turqi dhe ndaj qytetarëve të saj”, thuhet në deklaratën e ministrisë së Jashtme turke.
Ankaraja kritikoi gjithashtu Elaraby se nuk ngriti zërin kur kurdët e PKK-së deklaruan një kanton autonom në disa pjesë të Irakut. Ankaraja apeloi shefin e Ligës Arabe të mos mbështesë terrorizmin, por luftën kundër tij.
Komentet më të fundit të Elaraby nuk kanë qenë të konsultuara me anëtarët e tjerë të Ligës, dhe reflektojnë opinionin e tij, sipas deklaratës së Ankarasë e cila citon reagime të këtyre të fundit, përfshi Katarin.
Që prej sulmit në Suruc në 20 Korrik, vendi po përjeton një valë shpërthimesh, sulmesh e arrestimesh. Më shumë se 20 trupa të sigurisë janë vrarë në sulme që i atribuohen kryesisht militantëve të PKK-së dhe të paktën 1300 persona janë arrestuar në operacione që kanë pasur në fokus grupin.
F0rcat ajrore turke kanë ndërmarrë sulme ndaj bazave të PKK-së në Turqi dhe në veri të irakut. Partia e Punëtorëve të Kurdistanit është e listuar si organizatë terroriste në Turqi, në SHBA dhe në BE. /tesheshi.com/
