Një pikturë e Marc Chagall, një nga 15 veprat e artit të vjedhura nga nazistët dhe që iu kthye trashëgimtarëve të tyre nga Franca, do të ofrohet në shitje më 15 nëntor në New York, njoftoi shtëpia e ankandeve Philips.
Vaji i Chagall-it në kanavacë “Babai” i vitit 1911, një vepër vlera e së cilës vlerësohet midis 6 dhe 8 milionë dollarëve, u ble në vitin 1928 nga David Sender, i cili humbi pronën e tij kur u detyrua të jetonte në geto hebraike në Lodz, Poloni, raporton AFP.
Sender, i deportuar në kampin nazist të përqendrimit Aushvic, ku iu vranë gruaja dhe vajza, i mbijetoi luftës dhe u vendos në Francë në vitin 1958, ku vdiq tetë vjet më vonë, por piktura nuk iu kthye.
Ndërkohë, vepra është rishfaqur në ekspozita dhe ka dalë se është blerë nga vetë Chagall, me siguri mes viteve 1947 dhe 1953, pa e ditur se kujt i përkiste më parë, tha shtëpia e ankandeve.
Ligji për kthimin e pikturave të grabitura
Pas vdekjes së artistit në 1985, vepra e tij hyri në koleksionet kombëtare në 1988, më pas u caktua në Qendrën Pompidou dhe u depozitua në Muzeun e Artit dhe Historisë së Judaizmit në Paris.
Në fillim të vitit, Franca miratoi njëzëri një ligj në parlament për t’u kthyer 15 vepra familjeve hebreje që u grabitën nga nazistët.
Trashëgimtarët e David Sender vendosën të shesin pikturën, që është një skenar i zakonshëm “kur një vepër kthehet pas një kohe të gjatë, sepse ka shumë trashëgimtarë dhe vepra nuk mund të ndahet”, tha shtëpia e ankandeve.
Fotografia është një portret i babait të Chagall dhe është pikturuar në vitin 1911 kur artisti mbërriti në Paris.
Marc Chagall (1887-1985) lindi në Bjellorusi, ahere pjesë e Rusisë dhe më pas Bashkimit Sovjetik. Më vonë e kaloi pjesën më të madhe të jetës në Francë. Veprat e tij më të famshme janë Nusja (1950), Bastilja (1953), Mbreti David (1961), Profeti Jeremia (1968) dhe Nëntë dritaret e temave biblike (1978-1985). /tesheshi.com/
