Një anije luftarake amerikane lëshoi rreth 30 të shtëna paralajmëruese pasi anije iraniane të Gardës Revolucionare u afruan pranë tyre në ngushticën e Hormuz, tha Pentagoni.
Kjo është hera e dytë në muajin e fundit që anijeve ushtarake amerikane u është dashur të lëshojnë të shtëna paralajmëruese për shkak të asaj që ata thanë se ishte sjellja e rrezikshme e anijeve iraniane në rajon, pas një qetësie relativisht gjatë vitit të kaluar, sipas Reuters.
Një zëdhënës i Pentagonit, John Kirby, tha se të shtënat paralajmëruese u qëlluan pasi anijet iraniane u afruan 150 metra ndaj anijeve luftarake të SHBA, përfshirë kryqëzorin me raketa USS Monterey, i cili po gjurmonte nëndetësen Georgia.
Kirby tha se të shtënat e para ndodhën kur anijet iraniane u afruan në 300 metra nga anijet amerikane dhe të dytat kur u afruan në 150 metra.
“Ata u sollën shumë agresivisht,” tha ai, duke shtuar se numri i anijeve iraniane ishte më i lartë se më parë.
Negociatat e Uashingtonit dhe Teheranit
Incidenti i fundit ndodhi ndërsa fuqitë botërore dhe Irani kërkojnë të shpejtojnë përpjekjet për të kthyer Uashingtonin dhe Teheranin në marrëveshjen bërthamore të vitit 2015. Marrëveshja supozohej të kufizonte Iranin në zhvillimin e programit të tij bërthamor, ndërsa në këmbim Shtetet e Bashkuara do të hiqnin sanksionet ndaj këtij vendi.
Zyrtarët amerikanë u kthyen në Vjenë javën e kaluar për një raund të katërt të bisedimeve indirekte me Iranin se si të vazhdojnë t’i përmbahen marrëveshjes, nga e cila ish-presidenti Donald Trump u largua në 2018, duke e detyruar Iranin të shkelë kushtet e marrëveshjes.
Irani tani thotë se nuk duhet të ndërmerrent asnjë hap tjetër derisa Shtetet e Bashkuara – pala e parë që tërhiqet nga marrëveshja me iniciativën e saj – të kthehet në marrëveshje.
Teherani po kërkon gjithashtu heqjen e sanksioneve. /tesheshi.com/
