Debati mbi gjuhën zyrtare në Pakistan është i hershëm. Sipas një plani të fundit, gjuha urdu do të përdoret për tërë veprimtaritë zyrtare brenda dhjetë apo pesëmbëdhjetë viteve.
Reforma e gjuhës është lajmëruar në një intervistë për shtypin e huaj nga ministri i Reformës Kombëtare dhe i Planifikimit të Zhvillimit, Ahsan Ikbal, i cili sqaroi se masa e mësipërme është e bazuar në një vendim gjykate të vitit 1973.
Me kryeministrin Navaz Sharif në mbështetje të kësaj reforme, parashikohet që të gjitha fjalimet e mbajtura nga presidenti e gjer te zyrtarët e nivelit më të ulët, në ceremonitë, protokollet, takimet e vizitat brenda ose jashtë vendit, do të jenë në gjuhën urdu.
Pakistani synon kësisoj të mos e përdorë më anglishten si gjuhë zyrtare brenda një dekade, apo në pak më tepër kohë, për ta zëvendësuar fund e krye me atë urdu.
Ikbali u është përgjigjur dhe zërave që e shohin këtë plan si një goditje ndaj brezit të ri, që çmohet si më i hapur ndaj kulturës perëndimore. Ministri ka argumentuar se kjo reformë do ta bëjë Pakistanin më demokratik, pasi do të “ndihmojë në sigurimin e një pjesëmarrjeje më të madhe të njerëzve të cilët nuk e njohin anglishten, duke e bërë kështu qeverisjen më përfshirëse.”
Anglishtja është aktualisht gjuha zyrtare e Pakistanit, e përdorur në të gjitha nivelet e administrimit të vendit. Përdorimi i saj është mbizotërues po ashtu në arsim. Kushtetuta dhe ligjet e Pakistanit janë të shkruara në anglisht.
Ndryshe anglishtes, gjuha urdu është gjuha kombëtare e Pakistanit. Ajo ka një përdorim të gjerë, ndërsa kuptohet dhe flitet nga rreth 100 milionë njerëz anekënd botës. Atë e gjejmë të përdorur në Nepal, Bangladesh, Afganistan, në vendet e Lindjes së Mesme, në Afrikën e Jugut, në Kanada dhe në Mbretërinë e Bashkuar, si dhe në Karaibe. /tesheshi.com/
