Miqësorja mes Gjermanisë dhe Anglisë në “Olympiastadion” të Berlinit është kthyer në një dramë të vërtetë. Nga një kryesim me dy gola i gjermanëve, rezultati është përmbysur, për të fituar në fund anglezët.
Portieri i anglezëve e shpëtoi portën e tij fillimisht në minutën e 13-të, ndërsa gjyqtari i anuloi një gol Mario Gomez-it në minutën e 27-të për një pozicion jashtë loje, që rezultoi të mos kishte qenë i tillë.
Dhe goli për gjermanët do të vinte dy minuta para fundit të pjesës së parë. Kroos u ka shënuar anglezëve. Gomez e thellon rezultatin në minutën e 57-të, e 2-0 për Gjermaninë.
Këtu nis dhe kthesa për anglezët. Eshtë Harry Kane që vetëm pas katër minutash i ngushton mrekullueshëm shifrat. Në të 75-tën minutë i vjen radha Jamie Vardy-t të shënojë golin e barazimit, e të parin e tij për Anglinë.
Por nuk merr fund me kaq, teksa Eric Dier befason në minutën e 91-të me golin e tij. 2-3 për Anglinë!
Një fitore e shkëlqyer për djemtë e Roy Hodgson-it, që ia dolën ta përmbysin rezultatin nga 2-0 në 2-3. Kështu Anglia lëshon një sinjal të fortë për Euro 2016-ën, duke u shpërfaqur si një pretendente, me vetëm një humbje në 17 takimet e fundit ndërkombëtare.
Ronney, kapiteni i Anglisë, mungoi për arsye dëmtimi në takimin e mbrëmshëm, por loja e shkëlqyer nga Hary Kane dhe Dele Alli paralajmëron fundin e epokës së tij, e nisjen e një epoke të re. /tesheshi.com/
