Kombëtarja angleze do të luajë ndaj Turqisë dhe Portugalisë në ditët e fundit para se të fillojë kampionati europian që do të zhvillohet në Francë. Ndeshjet miqësore përfshijnë dhe një përballje me Australinë, me synimin që anglezët të jenë gati për një paraqitje të mirë e për të pretenduar për ta fituar aktivitetin.
Anglezët do t’i presin turqit të dielën e 22 majit në “Etihad Stadium”, në Mançester, ndërsa me portugezët do ta luajnë ndeshjen më 2 qershor në “Wembley”.
Australia do të pritet në Sandërland, më 27 maj. “Jam i lumtur që kemi siguruar tre kundërshtarë sfidues,” deklaroi trajneri i Anglisë, Roy Hodgson.
Turqia dhe Portugalia janë të kualifikuara për në Euro 2016, dhe rregullorja e mëhershme e UEFA-s nuk lejonte më shumë se një miqësore me një skuadër pjesëmarrëse në Europian në muajin para aktivitetit. Rregullorja e re i lejon dy miqësore, me kusht që skuadrat të mos jenë të të njëjtit grup.
Anglia ka dhe dy miqësore të tjera luksi në mars. Më 26 mars do të luajë në miqësoren ndaj Gjermanisë në fushën e kësaj të fundit, për të pritur tre ditë më pas, më 29 mars, Holandën.
Rusia, Sllovakia dhe Uellsi janë kundërshtarët e Anglisë në grupin B në Europian. Anglia e nis kampionatin europian me ndeshjen ndaj Rusisë më 11 qershor. /tesheshi.com/
