Dy zëvendësuesit, Vardy e Sturridge, e justifikuan plotësisht besimin e trajnerit Hodgson, duke i dhënë Anglisë fitoren me golat e tyre.
Në derbin e Britanisë, fitorja i ka buzëqeshur Anglisë falë këmbënguljes në pjesën e dytë, për t’i lënë të pikëlluar uellsianët në anën tjetër.
Nën mbështetjen e tifozërive të zjarrta, që nuk do të pushonin për asnjë çast, takimi mes Anglisë dhe Uellsit do të niste me një futboll tipikisht anglez.
Uellsianët do të ishin me fat, pasi do të shënonin në të parën gjuajtje brenda kuadratit. Gareth Bale do të realizonte nga jashtë zonës, pas një goditjeje dënimi. Topi i gjuajtur fort nga ylli i Realit të Madridit nuk do të pritej mirë nga Hart, duke përfunduar në rrjetë. E kjo ndodhi tre minuta para mbylljes së pjesës së parë. Uellsi mori kryesimin 1-0.
Vardy e Sturridge do të zëvendësonin Kane-in dhe Sterling-un me të nisur pjesa e dytë. Një sulm i ndryshuar tërësisht do të jepte menjëherë frytet e veta. Vardy i barazon shifrat në minutën e 56-të.
Hodgson nuk do të bënte gabimin e ndeshjes së shkuar, dhe do ta linte gjatë tërë ndeshjes në fushë Rooney-n, që në pozicionin e ri në mesfushë pati rol të posaçëm në suksesin e kësaj pasditeje. Kur u duk se po shkohej drejt një barazimi, Sturridge tregohet këmbëngulës brenda zonës kundërshtare në minutën e 91-të, gjuan dhe e kalon Anglinë në epërsi.
Gëzim i paparë tek anglezët, që festojnë fitoren. Rezultati 2-1 i ngjit ata në krye të grupit B, me 4 pikë. Dëshpërim te Uellsi për golin e pësuar në fund. Gjithsesi ata mbeten të dytët në këtë grup, me mundësi të mira për t’u kualifikuar. /tesheshi.com/
