Pothuajse 170,000 punëtorë lanë punën e tyre në sistemin e kujdesit shëndetësor të Anglisë vitin e kaluar.
Në analizën e British Observer, thuhet se ky është një largim rekord i personelit profesional shëndetësor, profesionistëve të cilët po përballen me presion të paparë brenda sistemit shëndetësor, transmeton The Guardian.
Më shumë se 41,000 infermierë lanë punën e tyre në spitale dhe numri i përgjithshëm i punonjësve që u larguan në vitin 2022 u rrit me më shumë se 25 për qind krahasuar me vitin 2019.
Kjo situatë ka bërë që kryeministri Rishi Sunak të prezantojë një plan të ri për trajnimin dhe motivimin e stafit mjekësor profesional.
Sir Julian Hartley, shefi ekzekutiv i Shoqatës së Ofruesve të NHS, tha se “punonjësit e kujdesit shëndetësor kanë bërë një punë të shkëlqyer gjatë pandemisë, por nuk ka pasur pushim”.
Të dhëna shqetësuese
“Të dhënat për largimin e njerëzve janë shqetësuese dhe ne duhet t’i kthejmë ato. Ne duhet të tregojmë se punëdhënësit me të vërtetë kujdesen për njerëzit e tyre në vijën e parë”, tha ai.
Hartley mirëpret planin e fuqisë punëtore, veçanërisht zgjerimin e praktikave për stafin klinik dhe ambicien për të trajnuar më shumë staf dhe për të reduktuar varësinë nga rekrutimet ndërkombëtare dhe punonjësit e agjencive.
Në vitin e kaluar, 169,512 staf u larguan nga NHS në spitale, shërbime shëndetësore në komunitet dhe organizata të tjera shëndetësore parësore, krahasuar me 149,678 një vit më parë.
Shifrat i referohen të gjithë stafit, përfshirë mjekët, infermierët, personelin e urgjencës, drejtuesit, stafin mbështetës dhe stafin teknik. /tesheshi.com/
