Kancelarja gjermane mbërrin sot për herë të tretë në Arabinë Saudite, pas vizitave të mëhershme në vitet 2007 dhe 2010.
Forcimi i marrëdhënieve dypalëshe përmes nënshkrimit të një numri marrëveshjesh do të jenë në axhendën e kësaj vizite, gjatë së cilës Merkel do të takohet me figurat më të larta të vendit arab, përfshirë dhe mbretin.
Mes çështjeve të tjera në bisedime do të zënë vend zhvillimet rajonale dhe ndërkombëtare, fushat e bashkëpunimit midis dy vendeve, si dhe ndërveprimet e mëtejshme.
Kancelaren e shoqëron në vizitën e saj një delegacion ekonomik i nivelit të lartë, çka lë të kuptohet se marrëdhëniet ekonomike do të kenë hapësirën kryesore në bisedimet.
Arabia Saudite dhe Gjermania kanë lidhje të ngushta tregtare. Sauditët renditen të dytët në partnerët tregtarë të gjermanëve në botën arabe. Gjermania zë vendin e tretë në importet e Arabisë Saudite.
Me marrëdhëniet diplomatike të vendosura mes dy vendeve në vitin 1954, dy vendet kanë një partneritet të ngushtë, shoqëruar me vizita të ndërsjellta të niveleve të larta. /tesheshi.com/
