Kancelarja gjermane në largim Angela Merkel shpreson se më shumë gra do t’i bashkohen udhëheqjes së partisë së saj CDU.
“Ne duhet të punojmë për t’i bërë gratë më të guximshme kur bëhet fjalë për plotësimin e posteve të rëndësishme”, tha Merkel për Süddeutsche Zeitung të shtunën.
Gratë, edhe kur ka mjaft prej tyre në një kompani apo organizatë, ende rrallë vendosin të kandidojnë për poste drejtuese, tha ajo.
Duke komentuar riorganizimin aktual të CDU-së pas humbjeve të zgjedhjeve parlamentare, Merkel tha se një parti që i drejtohet masave të gjera duhet t’i kushtojë vëmendje përfaqësimit të barabartë të burrave dhe grave në organet drejtuese.
“Vetëm burra, kjo nuk i përshtatet më kohës sonë,” tha Merkel.
Merkel, e cila ishte në krye të CDU-së deri në dhjetor 2018, shprehu optimizëm se partia e saj do të nxjerrë mësime nga humbja në zgjedhjet parlamentare.
Angela Merkel nuk kandidoi në zgjedhjet e fundit, dhe që nga e marta, kur është planifikuar seanca themeluese e Bundestagut të ri, deri në formimin e kabinetit të ri, ajo është në krye të qeverisë teknike. /tesheshi.com/
