Kancelarja gjermane, Angela Merkel ja ka thënë në sy presidentit Hashim Thaçi se institucionet kosovare duhet ta luftojnë korrupsionin e krimin e organizuar, ndërsa ka ripërsëritur se Gjermania mbetet aleate e Kosovës.
“Gjermania mbetet aleat i fuqishëm i Kosovës duke mbështetur rrugën e saj integruese për në Bashkimin Evropian. Por para kësaj duhet që Kosova ta luftoj korrupsionin dhe krimin e organizuar”, ka thënë Merkel në konferencën e përbashkët që zhvilloi me Thaçin.
Merkel shtoi se çështje tejet e rëndësishme është edhe marrëdhënia e Kosovës me Serbinë.
“Çështje qendrore në lidhjen afrimin në BE natyrisht është raporti në mes të Kosovës dhe Serbisë dhe ky raport do të zër vend qendror në bisedat tona që do të kemi pas pak. Ne e dimë që ky raport nuk është i thjeshtë, por besoj që ka pasur disa përparime por duhet të punohet edhe më shumë. Marrëveshjet që janë nënshkruar duhet të zbatohen. Prioritet në këtë kohë ka Bashkësia e Komunave Serbe dhe çështjet e energjetikës”, tha ajo.
Gjithashtu, kancelarja gjermane tha se duhet të bëhet më shumë për uljen e papunësisë, për të cilën pohoi se është e madhe.
Në fund Merkel tha se takimi me Thaçin i shërben përgatitjet për Samitin e Sofjes që mbahet këtë muaj dhe Procesit të Berlinit që në qershor vazhdon në Londër. /tesheshi.com/
