Monitoruesit ndërkombëtarë thonë se kanë pikasur një lloj të ri sistemi rus armatimi në rajonet separatiste të Ukrainës, që mund të përbëjë provën se Moska vijon të mbështesë krahinat lindore edhe pas fokusimit të saj në Siri.
Organizata për Sigurinë dhe Bashkëpunimin në Europë, e cila monitoron armëpushimin në lindje të Ukrainës, raportoi se ekipet e saj kanë parë një system armatimi të lëvizshëm “Buratino”.
“Buratino” është e pajisur me koka termobarike që shpërndajnë lëng të djegshëm rreth shënjestrës së tyre, e mund të shkatërrojë disa blloqe në qytet vetëm me një goditje duke shkaktuar dëme të mëdha, pa dallim.
Vetëm Rusia e disponon një system të tillë dhe ai nuk ka qenë i pranishëm në Ukrainë përpara se të shpërthente konflikti, sipas institucioneve që monitorojnë eksportet e armëve.
Gjetjet e raportit të OSBE-së e kanë vendosur në gjendje të sikletshme Kremlinin, që ka ulur retorikën për Ukrainën dhe e ka drejtuar vëmendjen në Siri, ku ka nisur sulmet ajrore. Raporti vjen ndërsa presidenti Putin përgatitet për bisedime në Paris me liderët e Gjermanisë, Francës dhe Ukrainës për procesin e paqes.
Rusia e ka mohuar që dërgon armë në Ukrainë. Por ka shenja të shumta se Moska i mbështet separatistët me trupa dhe pajisje. /tesheshi.com/
