Kërcënimi i Komisionit Evropian për të bllokuar eksportet e vaksinave COVID-19 në vendet me norma më të larta të vaksinimit, përfshirë Britaninë, është mbështetur nga Gjermania, Franca dhe Italia, thanë zyrtarët dhe diplomatët evropianë.
Presidentja e Komisionit Evropian Ursula von der Leyen ka kërcënuar të ndalojë eksportin e vaksinave në mënyrë që të mbrojë doza të pakta për qytetarët e atyre vendeve qç po përballen me valën e tretë të një pandemie, raporton Reuters.
Në një takim të diplomatëve evropianë, të mbajtur menjëherë pas paralajmërimit të Von der Leyen, Gjermania, Italia, Franca dhe Danimarka mbështetën qëndrimin e Komisionit për zbatimin më të rreptë të kontrolleve të eksportit, sipas tre diplomatëve që morën pjesë në takim.
Hollanda, Belgjika dhe Irlanda kanë qenë më të kujdesshme, thanë dy zyrtarët, duke shtuar se një debat mbi këtë çështje do të mbahej në një samit të udhëheqësve të BE javën e ardhshme.
“E gjitha buron nga zhgënjimi në rritje me vaksinën AstraZeneca dhe presionin e shtuar për të bërë diçka në lidhje me të. Ne nuk kemi vaksina të mjaftueshme, ne eksportojmë si të çmendur, pa marrë asgjë”, tha një prej diplomatëve që morën pjesë në diskutime.
Një diplomat tjetër konfirmoi se arsyeja kryesore për qëndrimin më rigoroz ishte furnizimi i pamjaftueshëm me AstraZeneca në Bashkimin Evropian.
Kompania njoftoi javën e kaluar se synon të japë deri në 100 milion doza të vaksinës së saj në Bashkimin Evropian deri në fund të qershorit, në vend të 300 milion tç parashikuar në kontratë, duke përmendur problemet e prodhimit dhe kufizimet e eksportit.
Zyrtarët evropianë thanë se u ishte thënë nga AstraZeneca se nuk mund të eksportonin vaksinat e prodhuara në fabrikat britanike, sepse kishin një marrëveshje furnizimi me Britaninë që i jepte përparësi tregut britanik. /tesheshi.com/
