Kryeministri në detyrë, Isa Mustafa, dhe ministri i Punëve të Brendshme, Skënder Hyseni janë shprehur optimistë se Kosova do të anëtarësohet në Interpol, vendim që do të merret më 26 shtator në Pekin.
Mustafa tha se ai ka ftesën që në cilësinë e kryeministrit të marrë pjesë në Asamblenë e Interpolit, ku në rend dite është përcaktuar të jetë pranimi i Kosovës në këtë organizatë dhe se ka shpresa që një gjë e tillë do të ndodhë.
“Kemi biseduar dhe me miqtë tanë ndërkombëtar dhe jemi në proces të harmonizimit të aktiviteteve, në mënyrë që të arrijmë këtë anëtarësim. Natyrisht që anëtarësimi nuk varet prej nesh, sepse jemi në cilësinë e vëzhguesit atje. Varet dhe prej anëtarëve tjerë dhe asaj se çfarë përkrahje do të kemi. Por vet fakti që nga komiteti ekzekutiv i Interpolit ka hyrë në rend dite anëtarësimi i Kosovës dhe anëtarë të tij janë dhe disa vende që nuk e kanë pranuar Republikën e Kosovës na jep shpresa, që kjo do të kapërcehet”, tha Mustafa.
Optimist është edhe ministri në detyrë i Punëve të Brendshme.
“Ne na bënë optimist fakti se Komiteti Ekzekutiv, i cili përbëhet nga saktësisht 50 vende që na njohin dhe 50 që s’na njohin ka vendosur me unanimitet që të përfshijë në agjendë aplikacionin e Kosovës. Mbetet të behet punë e madhe, që të kërkohen votat dhe ato siç e tha kryeministri kërkohen duke besuar në objektivin që e kemi përcaktuar. Nuk mund të kërkojmë vota nëse nuk besojmë në objektiv tonë si shtet. Askush s’mund të japë garanci se do të ndodh kështu apo ashtu, por nga të gjitha takimet që kam pasur, jam optimist që çështja e anëtarësimit në Interpol do të trajtohet si teknike, e bashkëpunimit ndërkombëtar policor për të luftuar krimin ndërkombëtar dhe tej kufitar”, tha Hyseni. /tesheshi.com/
