Krerët e bashkësive fetare në Kosovë nënshkruan një deklaratë me anë të së cilës mbështesin anëtarësimin e vendit në agjencinë e OKB-së për trashëgiminë kulturore, UNESCO.
Letra e tyre i është dërguar drejtoreshës së Përgjithshme të UNESCO-s, Irina Bokova, Sekretarit të Përgjithshëm të OKB-së, Ban Ki-moon, dhe delegacioneve të vendeve anëtare të UNESCO-s.
Firmëtarë të kësaj deklarate janë Myftiu Naim Tërnava, kryetar i Bashkësisë Islame të Kosovës, Dr. Don Lush Gjergji, Vikar i Përgjithshëm i Kishës katolike në Kosovë, Pastori Driton Krasniqi, kryetar i Kishës Protestante Ungjillore të Kosovës, Sheh Lulzim Shehu, Bashkësia e Sufi Tarikateve të Kosovës, Baba Mumin Lama, kryetar i Komunitetit Bektashian në Kosovë, dhe Votim Demiri, kryetar i Bashkësisë Hebraike në Kosovë.
Në koment të kësaj letre, ministri i Punëve të Jashtme, Hashim Thaçi, thotë se ky veprim rrëzon teorinë e shtetit serb se me anëtarësimin në këtë organizatë dëmtohen bashkësi të caktuara fetare.
“Dëshmi se jemi bashkë kur interesat nacionale janë në pyetje, dëshmi e refuzimit tonë të teorisë raciste së Serbisë që Kosova në UNESCO e dëmton një bashkësi fetare apo tjetrën”, shkruan numri dy i qeverisë së Prishtinës, Hashim Thaçi në Facebook. /tesheshi.com/
