Një numër anëtarësh të parlamentit europian, saktësisht 57 prej tyre, i kanë dërguar një letër shefes së politikës së jashtme të BE-së, Federica Mogherini, ku e akuzojnë presidentin rus për arrestimin e pilotes ukrainase Nadiya Savchenko dhe kërkojnë vendosjen e sanksioneve kundër tij dhe 28 zyrtarëve të tjerë rusë.
“I gjithë pushteti [në Rusi] është përqendruar në duart e presidentit Vladimir Putin. Ai është përgjegjësi për vendimi politik për burgosjen e Nadiya Savchenko-s, pavarësisht apeleve të bashkësisë ndërkombëtare,” thuhet në letër.
Kjo letër vijon me kërkesën për sanksione, “Prandaj u bëjmë thirrje të ndërmerrni hapat e duhur për të nisur në nivel të BE-së vendosjen e sanksioneve personale kundër atyre zyrtarëve të Federatës Ruse që janë përfshirë në rrëmbimin, ndalimin e paligjshëm, në burgosjen dhe fabrikimin e akuzave kundër Nadiya Savchenko-s.”
Pilotja ukrainase akuzohet për vrasjen e dy gazetarëve rusë gjatë luftimeve në lindje të Ukrainës në qershorin e 2014-ës. Ajo do të rrëmbehej po atë muaj dhe do të çohej në Rusi, ku rrezikon të dënohet me 25 vite burg nëse shpallet fajtore. Qëndrimi i Nadiya Savchenko-s ka qenë sfidues deri tani ndaj autoriteteve ruse, posaçërisht ndaj presidentit Putin. /tesheshi.com/
