Misioni diplomatik i deputetit të CDU-së Andreas Lämmel në Tiranë, duket se është për të konkretizuar marrëveshjen e paraqitur para dy javësh nga nënkryetari i partisë së tij, David Mcallister, e që nuk u pranua nga Lulzim Basha. Pak ditë më vonë, gjatë takimit me Ramën në Presidencë në prani të Nishanit, Basha tha se ishte dakord me draftin e diplomatit gjerman, por që ishte Rama ai që e kishte kundërshtuar.
Po kush është gjermani i radhës që Merkel e ka dërguar si një mundësi të fundit për ta nxjerrë opozitën nga çadra e çuar në zgjedhje?
Lämmel është një inxhinier në profesion dhe ngjan sikur misioni i tij të jetë në përputhje me njohjen e mirë të konstrukti të politikanëve të vendeve ish-komuniste, duke qenë se dhe vetë është një politikan që vjen nga Lindja e Gjermanisë.
Është bashkuar me CDU-në në vitin 1990 pas bashkimit të Gjermanisë, ndërkohë që më parë ishte pjesëtar i një grupimi politik në Gjermaninë Lindore, tashmë me mur të rrëzuar.
Deputeti i CDU-së përfaqëson Saksoninë në Bundestagun gjerman, pra zonën që kryeqendër Lajpcigun dhe ka një përvojë përara viteve ‘90 me regjimin komunist dhe mentalitetet që ky regjim la në konstruktin politik.
Por Lämmel ka mbërritur në një mision më shumë se ndërmjetësimi, mbledhje faktesh që mund të shërbejnë për një marrëveshje që mund të negociohet gjatë javës së ardhshme kur i dërguari i Departamentit të Shteitit, Hoyt Lee t’i ketë mbyllur punët me bindjen e Lulzim Bashës për të mos bojkotuar zgjedhjet.
Një burim në KQZ i tha tesheshi.com se vetë kryetari Denar Bina ka deklaruar se është një klauzolë që mundet t’i shtyjë zgjedhjet për një muaj, e që mund të vijë si rezultat i një marrëveshjeje politike.
Bëhet fjalë për para 30 korrikut dhe jo më vonë, apo 6 muaj siç e kërkon Lulzim Basha.
Megjithatë, negociatat zhvillohen me dy fakte të kryera: nisnjen e fushatës për 18 qershorit dhe bojkotimin e opozitës.
Puna e ndërkombëtarëve natyrisht zhvillohet në këtë logjikë, duke mos hedhur në erë zgjedhjet dhe afatet kushtetuese jashtë limiteve të tyre.
Misioni në heshtje i Andreas Lämmel,ka ardhur si pasojë e një sinjali që Lulzim Basha ka dërguar te partia e Merkelit se është gati të rinisë edhe njëherë negociatat për paketën Mcallister.
Ndaj kancelarja dërgoi në momentin e fundit një inxhinier nga ish-lindja komuniste që të merrej vesh me kolegët e tyre shqiptarë, një vend që gjithashtu vjen nga komunizmi por edhe lidhja me rusët. (Prapë dolën rusët?)
Dhe duket se në këtë rast nuk është thjesht rastësi, pasi dikur në Gjermaninë lindore ka qenë gjuha e parë e huaj më e përhapur në vend.
Ndërkaq, një delegacion me 9 kongresmenë amerikanë ka mbërritur në Tiranë dhe kryesohet nga Bob Goodlate, i cili është kryetar i Komisionit të Drejtësisë.
Vizita e tyre në Shqipëri nisi sot me një takim me Presidentin Nishani në vilën qeveritare në Bllok.
Takimi me kreun e shtetit ka zgjatur rreth orë dhe në qendër të tij ka qenë zhbllokimi i ngërçit politik për të nisur zbatimin e Reformës në Drejtësi.
Pas Nishanit, delegacioni nga kongresi amerikan ka takuar kryetarin e Kuvendit, Ilir Meta, njëkohësisht President i zgjedhur.
Edhe me Metën është diskutuar për drejtësinë dhe zgjidhjen e ngërçit që do të bënte të mundur pjesëmarrjen e opozitës në zgjedhjet e 18 qershorit. Në takim është i pranishëm edhe Donald Lu.
Në axhendën e delegacionit amerikan janë parashikuar edhe takime të tjera me zyrtarë të shtetit shqiptar, ku përfshihen pa diskutim dhe Rama e Basha. E gjitha kjo para ardhjes të hënën të zëvendësndihmëssekretarit amerikan i Shtetit, Hoyt Brian Yee, por dhe para protestës së paralajmëruar të opozitës ditën e shtunë, ku është paralajmëruar një shpërthim eventual dhune. /tesheshi.com/
