Andi Lila, kavajasi i kombëtares shqiptare dhe ekipit të Janinës në kampionatin grek, është takuar me Mitropolitin e këtij qyteti duke i kërkuar ndjesë për humorin e publikuar ditë më parë, ku në qendër ishte pikërisht figura e tij klerikale. Këtë ndjesë, Lila e përcolli dhe ditë më parë, pak pas publikimit të videos, që po ashtu si dhe imami i njohur i Tiranës, Ahmed Kalaja, thanë se assesi nuk kishin patur për qëllim fyerjen e ndokujt, e aq më pak të një kleriku të besimit tjetër, e palejueshme kjo dhe për normat e etikës islame.
“Sot erdha tek një njeri i madh, tek Mitropoliti i Janinës dhe ndjehem i lehtësuar pas diskutimit që patëm. Duhet të jesh njeri i fortë për te kërkuar falje dhe akoma më i fortë është ai që fal. Faleminderit Maksim!”, ka qenë mesazhi i Lilës pas takimit me të. Siç njoftohet, edhe Mitropoliti grek nga ana e tij ka vlerësuar ndjesën e Lilës duke këshilluar pasjen e një respekti të ndërsjelltë mes njerëzve me besim të ndryshëm.
Interesant në këtë zhvillim është dhe qëndrimi i këshilltarit ligjor të klubit të Janinës, i cili gjatë shoqërimit të Lilës tek Mitropoliti, ka thënë se ngjarja është zmadhuar disi nga mediat shqiptare. /tesheshi.com/
