Carlo Ancelotti mund të jetë “shpëtuesi i lëkurës” së presidentit të Federatës italiane të Futbollit, Carlo Tavechio.
Sipas “Corriere dello Sport”, kontaktet me ish-trajnerin e Bayern, Real e Chelsea, kanë vijuar gjatë gjithë këtyre ditëve, e ndoshta të hënën, në mbledhjen decizive për Tavechion, mund të ketë edhe një “Po” të Ancelottit.
Por Don Carlo mund ta marrë parasysh këtë ofertë, vetëm nëse i garantohen disa kushte paraprake. Kështu ai kërkon të jetë në krye të Kombëtares së Italisë deri në Botërorin e vitit 2022 që zhvillohet në Katar. Po kështu, Ancelotti kërkon dorë të lirë në përzgjedhjen e stafit të tij, kur emri i parë është ai i Paolo Maldinit, që do të jetë menaxheri i skuadrës axure. Ancelotti po punon gjithashtu që të bindë edhe një “të përkëdhelurin” e tij, Andrea Pirlon, për ta patur dhe atë në stafin e përfaqësueses.
Vetë fantazisti sapo ka njoftuar tërheqjen nga futbolli i luajtur, por nuk e ka përjashtuar angazhimin në poste të tjera, në klube apo Kombëtare.
Do të krijojë Tavechio një trio fituese sërish? Kjo mbetet për t’u parë deri të hënën. Megjithatë, koha nuk është në favorin e tij, ndaj më shumë se kurrë, është momenti të pranojë me çdo kusht. /tesheshi.com/
