Carlo Ancelotti ka përfunduar tashmë aventurën e tij me Real Madrid-in, por ndërkohë, disa muaj më pas tekniku italian ka hapur letrat duke folur për ish-klubin e tij. Gjatë një interviste dhënë mediumit britanik The Independent, Carleto ishte i vetëdijshëm se vetëm titujt do ta mbanin atë në Madrid.
“Kur kam nënshkruar me Real Madrid-in, e kam ditur se gjasat e mija për të qëndruar aty vareshin krejtësisht nga fitimi apo mosfitimi i Ligës së Kampionëve. La Decima ishte diçka speciale për mua, pasi që nga dita e parë kur erdha në Madrid, flitej për këtë temë. Kishte kaluar kohë e gjatë që nuk e kisha fituar Champions-in dhe morra këtë barrë përsipër, duke ia dalur me mjaft sukses”, potencoi Ancelotti.
Ai theksoi më tutje se La Decima i mundësoi vetëm për një vit qëndrimin në klubin mbretëror, derisa theksoi se detyra e trajnerëve është ti kënaqin presidentët.
“Detyra e trajnerëve është t’i kënaqin presidentët e klubeve, por çelësi i suksesit mbetet tek marëdhëniet e trajnerit me lojtarët e tij. Skuadrat e mëdha kanë sukses atëherë kur ambientet brenda klubit të jenë perfekte. Futbollistët duhet të jenë të kënaqur me punën e tyre që bëjnë, në mënyrë që ata të tregojnë gjithë talentin e tyre që kanë”, përfundoi Ancelotti.
Tekniku italian së fundmi është përmendur si një zëvendësues i mundshëm i spanjollit Pep Guardiola tek skuadra gjermane Bayern Mynih, mirëpo deri më tani nuk ka asgjë konkrete. /tesheshi.com/
