Presidenti Erdogan paralajmëroi të mërkurën se Turqia do të zgjasë operacionin e saj ushtarak në Siri në qytetin Manbij, një masë që mund të sjellë forcat turke në konfrontim me ata të aleatit të tyre të NATO-s, Shtetet e Bashkuara.
Operacioni ajror dhe tokësor i Turqisë, tani në ditën e tij të pestë, synon luftëtarët kurdë të YPG-së të mbështetur nga SHBA në rajonin Afrin dhe ka hapur një front të ri në luftën civile shumë-anësore të Sirisë. Një shtytje drejt Manbij rreth 100 km në lindje të Afrinit mund të kërcënojë planet e SHBA-së për të stabilizuar një pjesë të Sirisë verilindore, shkruan Reuters.
Forcat turke dhe aleatët e tyre rebelë nisën operacionin “Dega e Ullirit” në Afrin, ngase Ankaraja e sheh YPG-në si një zgjatje të një grupi militant kurd që ka kryer një kryengritje prej tre dekade në pjesën juglindore kryesisht kurde të Turqisë.
“Me operacionin ‘Dega e Ullirit’, ne kemi penguar edhe njëherë ndeshjen e atyre forcave tinëzare, interesat e të cilëve në rajon janë të ndryshme”, tha Erdogan në një fjalim drejtuar krerëve lokalë në Ankara.
“Duke filluar në Manbij, ne do të vazhdojmë ta pengojmë lojën e tyre”.
Dallimet mbi politikën e Sirisë tashmë kanë tendosur marrëdhëniet e Turqisë me Uashingtonin pothuajse deri në pikën kritike. Për Shtetet e Bashkuara, YPG është një aleat i rëndësishëm kundër luftëtarëve të Shtetit Islamik dhe forcave të presidentit sirian Bashar al-Assad.
Një operacion turk në Manbij do të paraqiste rrezik për shkak të pranisë së personelit ushtarak amerikan brenda dhe përreth qytetit. Ata u vendosën atje marsin e kaluar për të penguar rebelët turq dhe ata të mbështetur nga SHBA-ja që të sulmonin njëri tjetrin dhe gjithashtu të kryenin misione trajnimi në Manbij.
Presidenti Donald Trump planifikon të ngre shqetësimet e SHBA-së mbi ofensivën turke në një telefonatë me Erdoganin që pritet të zhvillohet të mërkurën, tha një zyrtar i lartë i SHBA-së.
Në një intervistë me Reuters, zëdhënësi i qeverisë turke tha se ai sheh një mundësi të vogël që forcat turke të vinin ballë për ballë me trupat e SHBA në Manbij.
Luftëtarët sirianë të mbështetur nga SHBA në zonën Manbij janë vendosur në vijën e frontit për të përballuar çdo sulm turk dhe janë në kontakt me koalicionin e udhëhequr nga Shtetet e Bashkuara për mbrojtjen e qytetit të Manbij, tha të mërkurën zëdhënësi i tyre Sharfan Darwish.
“Ne jemi në gatishmëri të plotë për t’iu përgjigjur çfarëdo sulmi”.
Në vitin 2016, SDF i shtyu luftëtarët e Shtetit Islamik nga qyteti Manbij. Erdogan ka akuzuar Shtetet e Bashkuara të mosmbajtjes së një premtimi për të siguruar që qyteti të kthehet në kontrollin arab.
Vullnetarë amerikanë, britanikë dhe gjermanë që luftuan kundër Shtetit Islamik së bashku me forcat kurde në Siri, po ashtu ndodhen tani në zonën Afrin për të ndihmuar përballjen me Turqinë, tha SDF.
Sekretari i Mbrojtjes i SH.B.A.-së Jim Mattis ka thënë se ofensiva e Turqisë po shpërqendron përpjekjet për të mposhtur Shtetin Islamik.
Shtetet e Bashkuara kanë shpresuar të përdorin kontrollin e YPG-së mbi zonën për t’i dhënë atij muskujt diplomatik që ka nevojë, në mënyrë që të ringjallë bisedimet e udhëhequra nga OKB-ja në Gjenevë mbi një marrëveshje që do t’i jepte fund luftës civile të Sirisë dhe përfundimisht do të çonte në largimin e Asadit. /tesheshi.com/
