Edhe pse në një farë mënyrë rezultati në Francë parashikohej nga sondazhet, gjithsesi shumë analistë kanë bërë të ditur se në votën e raundit të parë do të pasqyrohet një lloj proteste apo votë urrejtje e francezëve pas një mori atentatesh terroriste dhe një retorike të dhunshme verbale anti-emigrante dhe anti-muslimane, pasi Marien Le Pen kanalizoi FRIKËN, duke e bërë si shtyllë të fushatës së saj. Por në fund asgjë nuk ndodhi.
Dhe po të shohësh me kujdes rezultatet, që nga kryeqyteti, del në përfundim se Franca nuk mund të jepte një votë antihistorike, pasi është një shtet që me vullnetin e saj ka pranuar një numër të madh qytetarësh nga vendet e Magrebit dhe Lindjes së Mesme të besimit musliman, të cilët janë bërë qytetarë të Francës; e që gjithashtu, edhe pse u rrethuan egërsisht në fushatë, dhanë kontributin e tyre në raundin e parë të zgjedhjes së presidentit të ri.
Ndryshe nga SHBA dhe krejt ndryshe nga Britania e Madhe që votoi me frikë në zgjedhjet e vitit të kaluar për presidentin dhe për referendumin BREX-it, Franca ka refuzuar terrorin dhe frikës dhe ka votuar me “mend në kokë”.
Po të shikosh të dhënat e raundit të parë të presidencialeve franceze, del në përfundimin se projektet populiste dhe ata që mbjellin frikë dhe antiracizëm kanë humbur ndjeshëm.
Po ashtu, një e dhënë tjetër shumë e rëndësishme në këtë raund del se ka dështuar dhe kapitulluar presidenti rus Vladimir Putin, i cili ka investuar shumë para e propagandë për të mbështetur kandidaten e së djathtës ekstreme, Marine Le Pen.
Në fushatën zgjedhore, Le Pen shkoi në Kremlin, Shën Petërsburg dhe lëshoi deklarata të forta ku Vladimir Putinin e cilësonte si liderin më të rëndësishëm dhe të fortë të botës, ndërkohë që rusët i cilësonte si populli më i madh europian.
Por e dhëna më e rëndësishme e zgjedhjeve presidenciale franceze është Parisi.
Marine Le Pen është në vendin e katërt ndërkohë që udhëheq Emanuel Macron me 34.8% të votave; në vend të dytë ndodhet François Fillon me 26.5% të votave, kurse i treti është komunisti Jean Luc Menenchon me 19.5% të votave.
Por edhe në Francë, Fronti National dhe Le Pen nuk është mazhorancë por në minorancë, nëse do të mbledhësh rezultatët e kandidatëve të tjerë që kanë qenë realisht antagonist të ideve dhe retorikës së Le Pen.
Kështu, Emanuel Macron, fituesi relativ i raundit të parë, ka marrë 23.8%, François Fillon, 19.9%, Jean Luc Melenco 19.5 dhe socialisti Benoit Hamon mori 6.3%. Po t’i mbledhësh të gjitha shifra shkon në 69.5.
Pra rreth 70% e francezëve kanë refuzuar projektin populist, antieuropeist, apo ksenofob të Marine Le Pen.
Kryetarja e Le Front Nationale ka fituar 21.6% ndërkohë që 5 vjet më parë në zgjedhjet presidenciale ë 2012-s mori 17%.
Pra ka 4% rritje krahasuar më parë, ku Franca gjatë kësaj kohe ka pësuar një valë të rëndë dhe të tmerrshme terrori thuajse çdo vit dhe që Marine Le Pen është parë si udhëheqësja e frontit politik që do t’i sigurojë Francës më shumë siguri; dhe ajo që është më e rëndësishmja se ajo mori përsipër që valën e urrejtjes ta kanalizojë politikisht drejt një vote popullore.
Ndërkohë, Le Pen ndërmori hapa dhe projekte ksenofobe anti-muslimane dhe anti-emigratore, dhe nga ana tjetër bëri deklarata të forta kundër shqiptarëve, kryesisht atyre të Kosovës dhe përkrahu rusët e serbët.
Balotazhi do të mbahet pikërisht pas dy javëve pra më 7 maj, kur dhe votohet në Kavajë për kryetarin e ri të bashkisë.
Nëse do të kemi një linearitet të bashkimit të votave dhe frymës politike, do të fitojë Emanuele Macron, politikani jo konvencional i qendrës franceze që formoi “Rilindjen franceze” apo “En Marche”.
Vetëm ndonjë ngjarje e rëndë dhe apokaliptike mund të ndryshojë gjërat.
Dy kandidatët kryesore që u renditën në vendin e tretë de të katërt, pra Françoise Fillon dhe Jean Luc Melenchon u bënë thirrje votuesve që në balotazh të votojnë kundër Le Pen-it, pra për Emanuele Macron. /tesheshi.com/
