Deputeti i PD-së, Astrit Patozi, i lënë jashtë listave të kandidatëve për deputetë nga kreu i partisë Lulzim Basha, e ka kursyer atë në një analizë të publikuar sot në faqen e tij me titull; “Kush po e ha karremin e helmuar të Edi Ramës”.
Ndryshe nga ç’pritej, Patozi ka vlerësuar taktikën elektorale të Bashës, i cili kundërshton hapur mundësinë e një bashkëqeverisje pas zgjedhjeve me PS-në.
“Legjenda e një koalicioni të madh pas zgjedhjeve po qëndron në qendër të fushatës së nëndheshme të 3 partive më të mëdha në garë, ndërkohë që po përbyllet java e parë, që kur PD zbriti më në fund në betejë. Është fare e qartë dhe e dukshme se kjo fabul e kudogjendur sot në Shqipëri, sa në terren, aq edhe në tribunat apo ekranet mediatike, është krijuar dhe ushqehet përditë nga Edi Rama, i cili është i vetmi përfitues nga efektet e saj”– shkruan Patozi.
Sipas tij vetëm Rama përfiton nga kjo taktikë pasi “duke krijuar idenë e rreme të një detanteje të gjatë politike në Shqipëri, Edi Rama po përpiqet të vrasë me një gur dy zogj, duke dëmtuar njëkohësisht planet dhe fuqinë elektorale të Partisë Demokratike dhe të LSI-së”.
Sipas Patozit një marrëveshje e mbyllur në tavolinë dekurajon fushatën e demokratëve të cilët tjetër gjë presin nga partia e tyre. “Vijoj të këmbëngul me forcë se ajo është qasja me e gabuar që mund të dëmtojë në mënyrë të pariparueshme shfrytëzimin e kapaciteteve reale të Partisë Demokratike, në funksion të rezultatit të zgjedhjeve të 25 qershorit”.
Por sipas tij kjo dëmton dhe LSI-në pasi “hedh në erë shpresat e LSI-së për të qenë sërish “king maker” në qeverinë e ardhshme, që ka qenë edhe gjeneratori i vetëm i fushatave të saj në të paktën në dy zgjedhjet e fundit”.
Duke marrë në analizë dy “peshqit” të cilët do të helmojë Rama me karremin e tij të bashkëqeverisjes Patozi thotë se PD po sillet ashtu siç duhet, ndërsa LSI jo.
“LSI-ja po përpiqet të krijojë përshtypjen se është e pashqetësuar nga kjo lojë e Partisë Socialiste, duke fryrë pa kursim përmasat e saj dhe duke e paraqitur veten si pretendente reale për të qenë forcë e parë në zgjedhjet e 25 qershorit. Por, sipas meje, kjo përpjekje e sforcuar dhe shumë larg të së vërtetës, e bën shumë qesharake, dhe në vënd që ta mbulojë, e zbulon më shumë, vështirësinë e Ilir Metës në këto zgjedhje”.
“Në ndryshim me Ilir Metën, PD ka zgjedhur të mbrohet nga ky diversion, duke u distancuar publikisht nga mundësia e një koalicioni të madh, idea e të cilit do të zbehte energjitë e demokratëve në fushatë. Lulzim Basha, që udhëheq opozitën e bashkuar nën siglën e Partisë Demokratike, ka deklaruar disa herë me forcë se nuk do të ketë pazar me Edi Ramën dhe LSI-së, duke fashitur çdo zë tjetër, qëndror ose periferik të opozitës, që i fryn kësaj legjende me pasoja shkatërruese. Kam bindjen, se kjo është mënyra më e mirë dhe e vetmja që Partia Demokratike të ruajë, jo vetëm ritmin e fushatës së vet, por dhe objektivat e saj për të fituar më 25 qershor”- shkruan Patozi në fund të analizës së tij duke vlerësuar fushatën e Bashës./tesheshi.com/
