Shtyrja me 1 orë e afatit të votimit nga ana e Komisionit Qendror të Zgjedhjeve më datë 25 qershor i ka dhënë një avantazh Partisë Socialiste.
Duke qenë parti e madhe ajo ka mobilizuar më shumë votues për t’i drejtuar në qendrat e votimeve dhe kështu ka marrë dhe më shumë vota me minutat shtesë të dhëna nga KQZ-ja.
Në këtë përfundim ka dalë Instituti i Studimeve Politike nga analiza e të dhënave për 60 minutat e fundit të votimeve.
“Tabela e IPR Marketing/Ora Neës jep të dhëna të detajuara mbi ndikimin e kohës shtesë tek partitë politike. Në 60 minutat shtesë votuesit i përkisnin 73.9% Partisë Socialiste, 13.2% Partisë Demokratike, 6.2% Lëvizjes Socialiste për Integrim, dhe 0-0.5% partive të tjera, ku më e penalizuara ishte LISTA dhe SFIDA”- argumenton ISP.
Si rezultat, nga shtyja e votimit përfitojnë partitë e madhe, sidomos partitë që kanë nivel të lartë mobiliteti, pra aftësi të organizojnë e motivojnë votuesit potencial të tyre për të shkuar tek kutia e votimit. Kjo zakonisht ndodh me motivim politik, por edhe me forma të tjera jopolitike, përfshirë përdorimin e infrastrukturës teknike (mjete transporti falas, etj).
Por ISP nuk arrin dot të thotë me saktësi nëse shtesa 60 minuta ndikoi edhe në rezultatin zgjedhor.
“Kjo kërkon analizë të detajuara zonë për zonë, sidomos ato ku votat e fundit përcaktuan mandatin, por një e dhënë është tashmë e qartë: në Tiranë mandati i fundit (gara midis numrit 19 të PS, 5 të LSI dhe 1 të PDIU) u vendos në minutat e fundit”.
A ishin ligjore argumentet e KQZ-së për të shtyrë votimin?
Në analizën e ISP-së thuhet se asnjë prej argumenteve të dhëna nga KQZ-ja nuk qëndron ligjërisht.
“Pati një debat mbi motivet zyrtare të KQZ: tri argumentet e tij ishin më shumë politike sesa ligjore, dhe përbëjnë një rast tjetër të standardeve të dyfishta. Referimi në vendimin e KQZ të numrit të ulët të votuesve, citimi i një shifre për temparatura (KQZ nuk është institucion që mat temperaturat dhe asnjëherë nuk ka ndodhur që temparatura të jetë e njëjtë në të gjithë territorin!!), apo alibia për festën fetare dhe ritet fetare, – një funksion ekstra i KQZ, – nuk gjen bazë ligjore dhe mbetet një rast studimi”./tesheshi.com/
