Analisti ushtarak izraelit: Humbja e Hamasit, shumë larg!

Analisti ushtarak izraelit Amos Harel tha se “dorëzimi” i Hamasit përballë një pushtimi të vazhdueshëm tokësor të Rripit të Gaza-s nuk është aspak një opsion.

Në një artikull të botuar në gazetën izraelite Haaretz të martën, Amos Harel trajtoi çështjen e luftimeve të ashpra në Gaza dhe vdekjet në radhët e ushtrisë izraelite.

Ai tha gjithashtu se Izraeli është ende larg nga mposhtja e Hamasit, duke shtuar se lideri i lëvizjes, Yahya Sinwar, nuk ka ndërmend t’u japë urdhra njerëzve të tij që të ndalojnë luftën.

Edhe pse ai pranoi se ushtria izraelite po vuan humbje dhe se “dorëzimi” i Hamasit nuk ka gjasa, analisti ushtarak izraelit beson se forca e përdorur nga ushtria, nëpërmjet vendosjes së tre ekipeve luftarake në Gaza dhe dëmeve të mëdha që ato shkaktojnë, po sjell fryte.

Pasojat afatgjata

Harel tërhoqi vëmendjen për faktin se ushtria izraelite u përball me rezistencë të ashpër nga luftëtarët e Hamasit në situata të caktuara, por ai beson se ata vështirë se mund t’i rezistojnë presionit ushtarak izraelit në pjesën perëndimore të qytetit të Gaza-s dhe periferitë e tij veriore.

Ai tha se Hamasi do të kërkonte të arrinte marrëveshje për shkëmbimin e të burgosurve, gjë që do ta paraqiste si një fitore strategjike.

Sipas një analisti izraelit, ushtria këtë herë mori miratimin për një operacion të madh tokësor, pavarësisht nga frika e politikanëve për dështim dhe humbje. Lidhur me shfaqjen e presionit ndërkombëtar ndaj Izraelit për të ndalur luftën, ai deklaroi se oficerët izraelitë në Gaza besojnë se “operacioni duhet të përfundojë vetëm pasi Hamasi të mposhtet”.

 Sa i përket shkatërrimit të shkaktuar nga pushtimi izraelit, Harel tha se mund të duhen vite për të hequr pasojat e atij shkatërrimi. /tesheshi.com/