Pamje dramatike të ditëve, madje edhe javëve të fundit po vijnë nga Kosova. Kryeministrja e Serbisë, Ana Brnabiç, tha dje se “në të vërtetë jemi në prag të një konflikti të armatosur”, dhe fajësoi “veprimet e njëanshme të Prishtinës”. Brnabiç tha se të gjithë duhet të bëjnë më të mirën për të “ruajtur paqen”.
Barrikada, pika të bllokuara kufitare me Serbinë, persona të maskuar… Këto janë pamjet e ditëve të fundit nga Kosova, pasi grupe qytetarësh të kombësisë serbe kanë bllokuar rrugët.
Ambasadori i Rusisë në Serbi, Aleksandar Boçan-Kharçenko, tha se “Beogradi mund të mbështetet në Moskë” për situatën në Kosovë dhe se Rusia dhe Serbia “do të vazhdojnë të koordinojnë qëndrimet për këtë çështje”.
Analisti politik Albinot Maloku tha se Republika e Kosovës po përballet me një situatë larg normales.
“Sidomos kur bëhet fjalë për situatën e krijuar në katër komuna me popullatë serbe, e cila praktikisht kontrollohet nga presidenti i Serbisë, Aleksandar Vuçiç dhe vartësit e tij politikë në Kosovë. Kanë kaluar më shumë se dy javë nga vendosja e barrikadave që e bëjnë të vështirë jetën për banorët e Mitrovicës Veriore, Leposaviqit, Zubin Potokut dhe Zveçanit. Përveç anarkisë totale shqetësuese është edhe propaganda serbe kundër qytetarëve. Qytetarët e kombësisë serbe në Kosovë kanë frikë nga grupet kriminale, me të gjitha llojet e informacioneve që marrin. Në anën tjetër, në këto katër komuna nuk ka prezencë policore dhe as mekanizma të tjerë të sigurisë së shtetit të Kosovës”, tha ai.
Sipas tij, ligjshmëria dhe rendi në këto katër komuna e kanë humbur kuptimin dhe kjo i shkon vetëm presidentit Vuçiç dhe Rusisë.
“Dhe përmes kësaj situate presidenti Aleksandar Vuçiç ruan pozitën e tij politike, të cilën e kontrollon plotësisht, duke mos lënë vend për asnjë opozitë racionale. Vuçiç, brenda korpusit politik serb, në Kosovë ka më shumë opozitë sesa në Serbi.
Zëri i opozitës nuk ekziston në Serbi. Republika e Kosovës është e tërhequr dhe nuk ka interes për konflikte në këto katër komuna, edhe pse sovraniteti i saj është nën agresion të ashpër. Shpresojmë që situata të mos eskalojë në asnjë lloj konflikti, por për momentin situata nuk është normale”, përfundoi Maloku. /tesheshi.com/
