SHBA-të kanë plane të mëdha për Ballkanin, thotë analisti politik rus dhe anëtar i Akademisë së shkencave të Rusisë, Petr Iskenderov.
Në një deklaratë të tij për Radio Sputnik, Iskenderov thotë se këto plane nuk nënkuptojnë vetëm prezencën politike në pjesë të caktuara të Ballkanit.
Iskenderov beson se Kosova do të bëhet pjesë e mbrojtjes antiraketore, të cilën Amerika po e vendos në Evropë.
‘’NATO, e në veçanti SHBA, dëshirojnë të vendosin Kosovën në qendër të planeve të tyre politike dhe ushtarake, veçanërisht për shkak të pozitës së shkëlqyeshme në të cilën ndodhet ky territor”, ka thënë Iskenderov.
Jo shumë larg, NATO ka pranuar Malin e Zi si anëtarin e 29 të Aleancës, në kohën kur kjo aleancë po bëhet gjithnjë më aktive në pjesët lindore dhe jugore, duke reaguar ndaj rrezikut rus si një prej arsyeve kryesore, shkruan Sputnik dhe shton se në rast se Amerika i realizon planet e saj në Kosovë, kjo nuk do të ishte ndonjë befasi e madhe.
Nëse kjo do të ndodhë, Kosova do të bëhet një prej nyjeve kryesore në mbrojtjen antiraketore të cilin Uashingtoni është duke e instaluar në Evropë, dhe të cilin Moska po e konsideron si kërcënim për sigurinë e saj.
E vetmja bazë e mbrojtjes antiraketore amerikane që është bërë operative deri më tani, është Rumania, ndërsa deri në vitin 2018 një pjesë e kësaj mbrojtjeje antiraketore pritet të instalohet edhe në Poloni.
Uashingtoni gjithashtu, dëshiron që ky rajon të shndërrohet në trampolinën për zhvillimin e infrastrukturës së saj në rajon.
Për shembull, ajo dëshiron që të vendosë radarët e saj apo sistemin raketor të mbrojtjes atje, sqaron Iskenderov.
Njëkohësisht, Kosova duhet të luftojë radikalizmin. Më shumë se 300 vetë nga ajo pjesë kanë shkuar të luftojnë në anën e Shtetit Islamik në Siri dhe Irak.
Ndoshta ky numër nuk tingëllon i lartë, duke marrë parasysh se atje jetojnë 1,8 milion banorë, por ky është numri më i madh i njerëzve i cili prej një territori të caktuar është nisur për në ISIS.
Kosova është bërë tokë pjellore për radikalët islamikë dhe grupe të ngjashme të cilat po shfrytëzojnë këtë hapësirë, të cilën praktikisht askush nuk e kontrollon, thotë Iskenderov.
Siç shkruan Sputnik, ky trend po zhvillohet paralelisht me ndikimin e Uashingtonit në atë territor, e Iskenderov beson se ekziston lidhje në mes të këtyre dy fakteve.
Duke marrë parasysh se shqiptarët e Kosovës kanë besim në SHBA-të, është e mundur që autoritetet në Kosovë dhe NATO të kenë ndonjë marrëveshje të fshehtë që këto procese të mos e pengojnë njëra-tjetrën. /tesheshi.com/
