I ashtëquajturi analist, Agron Gjekmarkaj; i cili edhe pse vjen nga bota e letrave është atashuar nëpër studio televizive që të diskutojë mbi politikën, sulmoi UET-in, të njohurin ndryshe si “universitet i Çilit”, përgjatë një debati në Top Story.
Puntata e së hënës e emisionit të Ballës i kushtohej promovimit të një platforme të hartuar nga stafi akademik i UET-it, ku mëtohet që t’i ndihet politikës me disa ide zhvillimore.
Të ftuar për ta paraqitur platformën ishin rektori Ardian Civici si dhe profesor Selami Xhepa. Edhe pse shfaqi respekt e vlerësim për këty dy emra të mendimit akademik, Gjekmarkaj shprehur ankesë ndaj faktit që kjo po ngjante si një formë promovimi e Universitetit Europian të Tiranës në nisje të këtij viti akademik. Vetë Gjekmarkaj është pedagog në Universitetin shtetëror, atë të Tiranës.
Megjithatë, palët në debat nuk e tretën diskutimin në këtë pikë.
Madje profesor Xhepa tha se nuk ishte aty për të përfaqësuar idetë e Çilit.
Gjekmarkaj konsiderohet një zë i opozitës në debatin publik, ku për t’u promovuar si “analist i djathtë” është investuar edhe vetë kreu i PD-së.
Në një moment të debatit në Top Story kjo u duk mëse evidente, ku nga një nivel pak akademik, diskutimi ra në nivel të rëndomtë politik; pasi Gjekmarkaj tha se nuk vlente trajtimi i asnjë çeshtjeje nga ato të platformës, pa folur më parë për zgjedhjet e lira dhe kanabisin.
Por në një moment, “analisti i djathtë”, tha një gjë të mençur kur e përcaktoi si primare domosdoshmërinë e një qasjeje etike dhe morale të politikës dhe mbi politikën, para çdo lloj reforme që ka si synim zhvillimin. Pra, teza se moraliteti duhet të jetë pikënisja e gjithçkaje. /tesheshi.com/
