“Një qeveri me 61 vota, e cila do të kishte përballë një opozitë të fortë në njërën anë dhe në anën tjetër do të varej nga Lista Serbe, nuk tingëllon aspak si formulë stabiliteti”. Kështu ka thënë në një intervistë dhënë gazetës “Zëri” analisti i njohur amerikan për Ballkanin, Daniel Serëer.
Megjithatë, ai ka shtuar se në këtë kontekst duhet të pritet dhe të shihet se çfarë realisht do të ndodhë.
Duke folur për situatën aktuale politike dhe ngërçin dymujor, Serëer tha se kjo zvarritje do të ketë edhe koston e vet.
Më tej analisti amerikan shprehet se do të ishte shumë më mirë sikur klasa politike kosovare do të arrinte deri te një konsensus politik për gjetjen e një zgjidhjeje sesa vendi të dërgohej në zgjedhje të reja parlamentare.
Duke folur për mandatarin e dytë, nëse PAN-i nuk arrin që të krijojë qeverinë, Serëer thotë se Kushtetuta e Kosovës ia mundëson dhënien e të mandatuarit Vetëvendosjes nga ana e presidentit, nëse kjo vërteton se ka mbështetjen e shumicës.
Në fund Serëer ka folur edhe për dialogun Kosovë – Serbi.
Ai shprehet se Serbia duhet ta njohë pavarësinë e Kosovës dhe t´a heqë atë nga Kushtetuta sa më parë. /tesheshi.com/
