Rusia mund të ketë lehtësuar përkohësisht ofensivën e saj ushtarake në Ukrainën lindore teksa përpiqet të mbledhë forcat për një ofensivë të re të madhe që shpreson se mund të jetë vendimtare, thonë analistët.
Forcat ruse nuk raportuan asnjë fitim territorial të mërkurën për herë të parë në 133 ditë lufte, sipas Institutit për Studimin e Luftës.
Kjo organizatë nga Uashingtoni pretendon se Moska mund të marrë një “pauzë operacionale”, por se kjo nuk do të thotë “ndërprerje e plotë e armiqësive” në Ukrainë.
“Forcat ruse ka të ngjarë të kufizohen në ofensiva relativisht të vogla, ndërsa përpiqen të krijojnë kushtet për operacione më të rëndësishme dhe të grumbullojnë fuqi luftarake për pushtime më ambicioze”, pohon Instituti.
Ministria e Mbrojtjes e Rusisë duket se e ka konfirmuar këtë vlerësim, pasi njoftoi se ushtarëve rusë që luftojnë në Ukrainë u është dhënë pushim.
“Repartet që kryen misione luftarake gjatë një operacioni special ushtarak po marrin masa për të pushuar dhe rikuperuar aftësitë e tyre luftarake. Ushtarëve iu dha mundësia të pushonin, të merrnin letra dhe pako nga shtëpia”, thuhet në deklaratën e raportuar nga agjencia TASS.
Granatimet vazhduan në Ukrainën lindore, duke vrarë të paktën nëntë civilë dhe duke plagosur gjashtë, thanë zyrtarët ukrainas.
Megjithëse luftimet kanë vazhduar, Ministria Britanike e Mbrojtjes supozon se Rusia po “rindërton” forcat e saj.
Shërbimi i inteligjencës i ministrisë pretendon se Rusia po përpiqet të sigurojë pushtime të mëparshme duke bombarduar përgjatë vijës së frontit në Donetsk. /tesheshi.com/
