Deutsche Welle sjell opinionet e analistëve për themelimin e Gjykatës Speciale në Kosovë, të cilët mendojnë se Gjykata Speciale do të ndihmojë në pajtimin e rajonit, por do të ndihmojë edhe Kosovën të dalë nga euforia nacionale e pas shpalljes së Pavarësisë dhe të nisë të ndërtojë shtet ligjor.
Komentatori i politikës së jashtme, Boshko Jakshiç thotë për DW se sic u kundërshtua në Serbi, formimi i tribunalit, që do të merrej me krimet që kanë kryer serbët, edhe në Prishtinë në të njëjtën mënyrë është refuzuar ideja e Gjykatës Speciale.
“Përballja me të vërtetat është parakusht për normalizimin e marrëdhënieve, edhe sikur të jenë të imponuara nga selia e Bashkimit Evropian. Mendoj se formimi i gjykatës do të çojë në forcimin e bashkëpunimit ndërmjet Beogradit e Prishtinës, do të kontribuojë për relaksimin e tensioneve në raportet e tyre dhe do t’u shërbejë shqiptarëve të Kosovës, nga të cilët pritet që të dalin nga periudha e euforisë nacionale e hapur me çështjen e pavarësisë shtatë vjet më parë, dhe të ndërtojnë në mënyrë më efikase shtetin e tyre ligjor”, thotë Jakshiç për DW.
Çështja e Gjykatës Speciale ka zgjatur shumë, thotë për DW Dushan Prorokoviç, drejtor ekzekutiv i Qendrës për Alternativa Strategjike.
“Fati i kësaj gjykate dhe i të gjithë proceseve, që zhvillohen në të, është në duar të Perëndimit dhe jo të shqiptarëve të Kosovës. Mendoj se për këtë arsye do të ketë shumë drejtësi selektive, se proceset do të jenë të kontrolluara rreptësisht dhe do të synojnë individë, të cilët nuk kanë pasur shumë kontakte me shërbimet perëndimore dhe politikanët gjatë luftës. Do të jenë pjesëtarë të rangut të mesëm të së ashtuquajturës UÇK dhe për këtë arsye mendoj se nuk bëhet fjalë që para kësaj gjykate t’i bëhet procesi Hashim Thaçit apo Ramush Haradinajt”, thotë Dushan Prorokoviç.
/tesheshi.com/
