Në emisionin “Rruga e Re” të gazetarit Muhamed Zekiri, për të debatuar rreth mbajtjes eventuale të zgjedhjeve të parakohshme parlamentare më 24 prill, si mysafir ishin të ftuar Arianit Hoxha nga Këshilli Opozitar, ish ministri i Arsimit dhe Shkencës Sulejman Rushiti dhe analisti politik Jove Kekenovski. Gjatë gjithë emisionit analistët deklaruan se pa pastrimin e listave zgjedhore, nëse zgjedhjet mbahen më 24 prill, do jenë kriminale.
“Ne e dhamë një vendim si Këshill Opozitar se në këto rrethana në këto kushte, me këtë marrëveshje gjysmake, zgjedhje mund të ketë, por do të jenë më të këqijat të mbajtura ndonjëherë në Maqedoni dhe më tragjike. Nëse marrim pjesë në këto zgjedhje, atëherë ne e legjitimojmë krimin”, deklaroi Hoxha.
Në të njëjtën vijë mendimi ishte edhe analisti Sulejman Rushiti, i cili deklaroi se ai si qytetar nuk do të votojë në ato zgjedhje.
“Mirëmëngjes fatkeqësi i thonë asaj. Unë për vete nuk do votoj në ato zgjedhje, pasi unë si qytetar nuk kam garanci. Unë mendoj se do të vijë një situatë e që do të ketë tensione nëse zgjedhjet mbahen më 24 prill”, tha më tej Rushiti.
Nga ana tjetër, analisti politik maqedonas Jove Keknovski u shpreh i bindur se edhe përskaj përpjekjeve të Gruevskit që zgjedhjet të mbahen më 24 prill, ato do të shtyhen për më vonë.
Sipas Marrëveshjes së Përzhinos duhen pastruar listat zgjedhore dhe duhet rregulluar çështja e medias. Deri tani, si opozita, gati se edhe gjithë opinioni në Maqedoni, vlerësojnë se këto kushte nuk janë plotësuar. /tesheshi.com/
